Alcoamut oqallinneq ikkannerarpaat
Kulturikkut illorsuaq Katuaq sisamanngormat Alcoamut tunngasumik oqalliffiuvoq. Peqatigiiffimmiit ”Aatsitsivik Soqutigaarput”miit oqallinneq kattuffinniit partiit assigiinngitsullu peqataaffigisaat soqutigalugu malinnaavigaat.
Akuersaartut isumaqarput, oqallinnerup kalaallisuuani oqallinneq uummaarinnerusumik ingerlanneqarsinnaagaluartoq piareersarluagaasimaluarpat.
- Alcoamut tunngasumik inuiaqatigiit ilisimasakippallaarput, soorunami uagut peqatigiiffimmiit paasissutissiilluarsinnaagaluarpugut. Maqaasivarpulli aatsitsiviliornissamut tunngasumik oqallinneq itisiliiffiunerusoq, Aqqalu Skifte peqatigiiffik Aatsitsivik soqutigaarpumi siulittaasoq taama oqarpoq.
Peqatigiiffiullu piginneqatigiiffittut ingerlatsisinnaanermut tunngasoq sukumiinerusumik oqallisigeqquaa. Inuiaqatigiit aningaasartuutigiumaagassaannut tunngassutilinnik pututitsiniaaffiuallaarsoralugu. Peqatigiiffik isumaqarpoq isumaqalersitsiniartoqartoq aningaasartuutit 22 milliardinik annertussusillit inuiaqatigiit akiligassarissagaat.
- Isumaqarpunga piginneqatigiiffiliornermi pisinnaatitaaffiit suunerinik oqallinneq imaqartariaqartoq, asuli inuiaqatigiit ersisaaginnarnagit, Alcoamut tunngasut aningaasartuutaajumaartussat 22 milliartit koruuninik annertussuseqartussat inuiaqatigiit akiligassarilissagaat, Wilhelm Josefsen Aatsitsivik Soqutigaarpumit oqarpoq.
Peqatigiiffik ”Nunatsinni Aluminiumik Aatsitsivik Naaggaarpara”, isumaqarpoq oqallinneq qarsupittumik annertuallaamik ingerlanneqartoq.
- Partiit tamarluinnarmik aningaasartuutaasussat sammivallaarpaat, partiit namminneq avatangiisinut inuiaqatigiinnullu anguniakkaminnik eqqaasaqanngilluinnarput. Tamannalu itisilikkamik sammineqarnerusariaqartoq isumaqarpuna, Bjarne Lyberth ”Ababsi” akerliusut peqatigiiffianni siulittaasoq oqarpoq.
Peqatigiiffiit marluk, akuersaartut akerliusullu isumaqarput oqallinneq malitseqartariaqaraluartoq.