Alcoamit CO2-mik mingutsitsineq akisoorujusuanngorsinnaavoq

Isumalluartumik kisitsigaanni taamatut, siunnersuisarfip Pricewaterhouse Coopersip Aatsitassanut ikummatissanullu pisortaqarfimmut nalunaarusiaa tunngavigalugu naatsorsorneqarsinnaapput.

Nunatsinni aatsitassarsiornermi aamma uuliamik gassimillu qalluinermi mingutitsinerup qanoq akeqarsinnaanera nalunaarsusiami sammineqarpoq.

Aluminiumik aatsitsivissamik pilersaarut ingerlaannassasoq, inuussutissarsiornermut naalakkersuisoq, Inuit Ataqatigiinneersoq Ove Karl Berthelsen, Radioaviisimut pingasunngormat oqarpoq. Nangiluni oqaatigaa, tamanna Nunatta Alcoallu akornanni aalajangersimasumik isumaqatigiissuteqarnikkut pissasoq.

Tassa Alcoa aallartissanersoq aallartissannginnersorluunnit apeqqutaanngilaq, apeqqutaginnarluni, qanoq allartinneqassanersoq. Naalakkersuisullu piginneriaatsimik eqqarsarneranni nalunaarusiami nutaami atuarneqarsinnaavoq, Maniitsumi aatsitsivissap mingutitsinera qanoq akeqassanersoq.

Nunatta Karsiani aningaasassameertumi aningaasat nassaariniagassat ikinngillat. Aluminiumimmi aatsitsivissaannarmit CO2 aniasoq Nunatta sinneranisulli annertutigingajattoq, siunnersuisarfiup Pricewaterhourse Copers-ip Aatsitassanut pisortaqarfimmut nalunaarusiaani atuarneqarsinnaavoq.

CO2-kvotit ullumikkut pisiarinaraanni tonsimut 14 euromik akeqarput. Alcoa-p Maniitsup eqqaani aluminiumik aatsitsiviliassaa CO2-mik 612.000 tonsinik ukiumut aniatitsisassasoq naatsorsuutigineqarpoq, tassalu ukiumut 46 millioni koruunit missaannik naleqarput. Taakkuali isumalluarluni naatsuinerupput, nalunaarusiarni naapertorlugu ilisimasallit oqarput, akit suli qaffaqqissasut.

Tassalu aningasartuutit ukiumut 313 milioni koruuninngorsinnaapput, immaqaluunni suli amerlanerullutik.

Nalunaarusiaq saqqummerpoq, silap allanngoriartornera pakkersimaanerarlugu nunat tamalaat isumaqatigiissutissaanni Nunatta, tunisassiorfissuarnik ineriartortitsisinnaajumalluni immikkut pineqarnissaannik kissaataa, Danmarkimit itigeqartinneqarnera ilutigalugu. Taamaakkaluartoq Naalakkersuisut siulittaasuata, Inuit Ataqatigiinneersup Kuupik Kleistip, aalajangiusimavaa, silap allanngoriartornera pakkersimaarniarlugu nunat tamalaat isumaqatigiissuteqarnissaanni Nunarput peqataassasoq.

Kuupik Kleistip Danmarkimi avatangiisinut ministeri, Konservativineersoq Conny Hedegaard, juunip 29-anni naapissavaa.