Alcoa pillugu aalajangernissaq upernaamut kinguartinneqarpoq

Inatsisartut aluminiumik aatsitsivimmik piginneqataanissaat pillugu aalajangernissaat ukiup tulliani upernaamut kinguartinneqarpoq. Paasissutissat aalajangiinermi tunngavissat tamakkiisut ukiup affaata ingerlanerani katersorneqassapput. - Inatsisartut aalajangernissaminnut tunngavigissaarnissaat kiisalu paaissutissat eqqortut aallavigalugit isummernissaat pingaaruteqarpoq, Greenland Developementimi paasissutissiinermi siunnersorti Ellen Christoffersen pisortaq, Flemming Drechsel sinnerlugu oqarpoq.
Allattoq Oline I. Olsen
juulip 15-at 2009 13:03

Piginneqataanissamut tunngassuteqartut Inatsisartut upernaakkut ataatsimiinnissaannut kinguartinneqarput.

- Misissuinerit assigiinngitsut peqqutigalugit, Inatsisartut piginnittussaanermut aalajangernissaat upernaakkut ataatsimiinnissaanut kinguartinneqarpoq, Ellen Christoffersen oqarpoq.

Alcoa pillugu suliap kinguaattoornissaa 2008-mili Greenland Developementimit ilisimaneqareerpoq, taamani sumiiffimmi misissueqqissaanermi nunami qillerinerit kinguaattoorput. Tassani paasisat aallaavigalugit naatsorsorneqartussaagaluarpoq erngup nukinga atorlugu nukissiorfiliornermut aningaasat qanoq amerlatigisut atorneqassanersut.

Piginnittussaanermullu apeqqutinut tunngatillugu paasissutissat pingaaruteqartut maanna katersorneqarput.

-Sulisussaqarnermut atatillugu sulilersussat nuttarsinnaaneranut tunngasut misissorneqarput kiisalu sulisussat tamarmik Kalaallit Nunaanni pigineqarnersut. Kalaallit Nunaat aatsitsivimmik piginneqataassanersoq imaluunniit piginneqataassannginnersoq kingunissai assigiinngitsuusinnaammata. Minnerunngitsumillu asimi misissuinerit takutittussaavaat erngup nukinga atorlugu nukissiorfiliorniarnerup aningaasatigut qanoq naleqartiginissaa. Taakkuuppullu piginneqataanissamut tunngatillug pisariaqarluinnartut paasissallugit, pingaartumik inuiaqatigiinnut aningaasarsiornikkut qanoq sunnerneqarsinnaaneranut aamma takussutissiisussaassammata, Ellen Christoffersen oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq