Alcoa-p aatsitsiviliornissaanut akerliusut peqatigiiffiliorput
Maniitsumi Alcoa-p pilersinneqarnissaanut akerliusut peqatigiiffittaarput. Maniitsup eqqaani Alcoap aatsitsiviliulersaarneranut, Maniitsormiut arlaqartut akerliunertik sivisuumik ingerlatereerlugulu maanna peqatigiiffiat pisortatigoortumik pilersinneqarpoq.
Peqatigiiffik nutaaq atserneqarpoq, Against Aluminium Smelter in Greenland, taakkulu allapput, siunertaralugu "Kalaallit Nunaanni aluminiumik aatsitsiviliunnginnissaq taasinikkut aammalu Naalakkersuisunit itigartinneqassasoq sulissutiginiarlugu".
Kulturikkut eriagisassat aamma pinngortitap avatangiisillu illersorneqarnissaat peqatigiiffiup pilersinneqarneranut pissutaatinneqartut ilagaat. Peqatigiiffik nutaaq isumaqarpoq oqartussanit paasissutissat amigaateqarpallaartut. Peqatigiiffik aamma isumaqarpoq, Kalaallit Nunaannut, pinngortitallu kusarnersuanut nunarsuarmioqatitta isiginninnerat ajoquserneqassanngitsoq.
Peqatigiiffiup aallarnerneqarnissaanik isumassarsiosup aammalu maanna siulittaasunngortup, Bjarne Lyberth-ip, Ababsip, siusinnerusukkut oqaatigisareerpaa, Alcoap aatsitsiviliornissaanut paasissutissat amigaateqarpallaarneri pissutigalugit aatsistsivimmik sanaartortoqartariaqanngitsoq. Aamma ilanngullu oqaatigereerpaa, sanaartortoqassappat inuiaqatigiinni ataqatigiinneq aammalu kikkut tamat oqartussaanerat innarlerneqassasoq.