Alcoa aatsitsivimmik piginneqatigiikkusuppoq
Maniitsup eqqaani aatsitsiviliornissamut atatillugu piginneqatigiinnissamut aalajangiinissaq upernaamut 2010-mut kinguartinneqartoq ippassaq saqqummiunneqarpoq. Tassa misissueqqissaarnerit piginneqatigiinnissamut apeqqutinut atorneqartussat kinguaattoormata. Taamaattor Alcoa piginneqatigiinnissaq orniginerullugu oqartiartuuteqareerpoq. Tassa Alcoa 50 procentimik aatsitsivimik piginnittuulluni sinnerilu Namminersorlutik Oqartussat pigissagaat. Alcoamit taamatut isummerneq Greenland Developementimit ilisimaneqarpoq.
- Alcoamit isummertoqarluni kissaatiginneqarpoq piginneqatigiinnikkut aatsitsiviliortoqassasoq, tamannalu isertuutinngilaat. Piginneqatigiinnikkut illuatungeriit iluanaaruteqarfigissagaat Alcoamit ilimagineqarpoq, Greenland Developementimi pisortaq Flemming Drechsel oqarpoq. Greenland Developementimit maanna misissuiffigineqarpoq piginneqatigeeriaatsit qanoq ilusillit periarfissaanersut. Kalaallit Nunaannit piginneqatigiissutsit 50 procentii tamakkiisumik pigineqarusussanngippata, taava piginneqatigiit pingasuunissaat misissorneqarpoq.
- Piginneqatasinnaasunik allanik attaveqareerpugut, massakkuungallartorli atinik taaguisinnaanngilagut, Flemming Drechsel nutaarsiassaqartitsivimmut Reutersimut oqarpoq. Taassuma inatsisartut massakkut aalajangernissaat kajumissaarutiginngilaat.
- Inatsisartut piginneqatigiinnermut apeqqutinut akissuteqannginnissaat isummersunnginnissaallu kajumissaarutigaara, tassami misissueqqissaarnerit maannakkut suli ingerlanneqarmata, Flemming Drechsel oqarpoq.
Inatsisartunut qineqqusaartoqarmat partiit arlallit piginneqatigiinnissaq orniginagu oqaaseqartarput.
