Alaskami aarrit nalunaaqutserneqartussanngorput
Aarrit 35-t nalunaaqutserniarsarissavaat, qaammataasakkut malinnaaffigineqarsinnaaniassammata. Immap sikuata sinaava illuarsimavoq, sikullu sinaava aarrit malittarisarmassuk isumaqarnarpoq aarrit allamut nuussimassasut.
Aarrit 40-t Marraarniarfiup, tassa Barrowip, avannaatungaani juulimi nalunaaqutserneqarput, taakkulu ilaat nunami nassaarineqareerput, sapaatip-akunnerinik marlunnik sioqqutsillutik taamaalisimallutik.
Imarpimmi Bering-Strædimi Ruslandimut atasumi aarrit nalinginnaasumik aasap naajartornerani nunamut pisaraluarput. Kisianni Imarpimmi Bering-Strædimi sikunikilliartorneranik pissuteqartumik aarrit tusindtillit arlallit 2007-imi 2009-milu nunamut pisimapput. Alaskami aviisimi Newstimesimi tamanna allaaserineqarpoq.
Aarrillu 20.000-init amerlanerusut, nunaqarfiup Kalip, Marraarniarfiup kujataata-kitaaniittup, eqqaanut siorna takkussimapput. Siornatigut taama pisoqanngisaannarsimalluni.
Silap pissusaata allanngoriartornera ilutigalugu immap sikuata annikilliartuinnarnera pissutigalugu aarrit nungutaanissaminnut aarlerinartorsiortutut assigiinngiiaartunik uumasoqarnera pillugu USA-mi ilisimatusarfimmiit nalunaarutigineqarusukkaluarput, tamannalumi qinnuteqaatigineqareerluni.
Aarrilli pissusilersornerat paasisaqarfigeqqaarlugu tamanna aatsaat pisinnaavoq, taamaammalluuna ilisimatuut nunaqarfiullu Kalip innuttai suleqatigiillutik misissuinialersut.
