Alapernaarsuutit Avannaani sungiusassapput
Sungiusarneq Pituffimmi upalungaarsimasut, annaassiniartartut assigisaallu, canadamiullu sinerissami alapernaarsuisui suleqatigalugit ingerlanneqassaaq, aallarniutigalugulu inunnik Pituffiup avataani qimagussortitsisoqassaaq, umiarsuillu alapernaarsuutit, Hvidbjørnen aamma Ejnar Mikkelsen, tassani peqataassapput. Sungiusaatigineqassaaq umiarsuarsuaq takornarniartaat ajornartorsiortoq, ikiueqqaarnerlu aamma umiarsuarmut ilaasut ajoqusersimasut qimagussorneqassapput.
Sungiusarnermi allami suleqatigiinneq sammineqassaaq. Tassani Hvidbjørnen, Ejnar Mikkelsen aamma sikumik aserorterut, Henry Larsen, Canadami sinerissami alapernaarsuisuneersoq peqataassapput. Immami annertuumi ujarlerneq sungiusarnermi pingaarnerutinneqassaaq. Taamaammat sakkutuut timmisartuat Challenger sungiusarnermi peqataassaaq.
Sungiusarneq peqataasunut tamanut annertuumik periarfissiissaaq, inoqarfiunngitsunimi umiarsualivinnut mittarfinnullu aqqutit imminnut ungasissorujussuusinnaapput - takornarniallu amerliartuinnartut ukiut tamaasa aamma tikittalerput, taamaammat isumannaallisaanissaq atorfissaqartinneqariartuinnarlunilu annertusarneqartariaqarpoq.
Sungiusarnermut atatillugu Hvidbjørnen aamma Ejnar Mikkelsen Lancaster Soundimut tikeraassapput, Lancaster Sound Sullualuup pulammagiaaniippoq, alapernaarsuutillu aamma Canadami Resolute-mut aqqusaassaput.