Akuutissaq toqunartortalik Cyanid Nalunami guld-imik piiaasoqalerpat atorniarneqarpoq
Kuultimik piaanissamik pilersaaruteqartoq tassaavoq aatsitassarsiutileqatigiiffik Nalunaq Guldminen, akuutissamik Cyanid-imik atuinissaminik Namminersorlutik Oqartussanut qinnuteqartoq.
Aatsitassarsiutileqatigiiffik Angel Mining Nalunaq Goldmine-imik pigittuusoq, kuultimik piaanermi akuutissamik toqunartortalimmik cyanid-imik mingutsitsisoqassanngitsoq neriorsuivoq. Taamaakkaluartoq pinngortitaq avatangiisillu pillugit peqatigiiffiup Avatap aammalu Inuit Issittormiut Siunnersuisoqatigiiffiata ICC-ip akuutissap cyanid-ip pinngortitamik mingutsitsinissaaa ernummatigineqarpoq.
Nunatsinni guldimik piiasoqartalermat, aatsaat kuulti piiarneqartoq nunatsinni suliarineqartalernissaa pilersaarutigineqarpoq, kuultillu piiarneqartup annertunersaa pissaarsiariniaraanni akuutissaq toqunartortaqartoq cyanid atorlugu iluatsilluarsinnaalluni, Nalunaq Goldmineimi teknikkimi pisortaq Ture Grønlund oqarpoq.
Cyanidip atorneqarsinnaanera pillugu Pinngortitaq Avatangiisillu pillugit Peqatigiiffik Avataq aammalu Inuit Issittormiut Siunnersuisoqatigiiffia ICC isumaannik Namminersorlutik Oqartussat Aatsitassat pillugu naalakkersuisoqarfimmit tusarniarneqarput, taakkualu akissuteqarnerminni ernumassuteqarput. Avatap siulittaasua Mikkel Myrop oqarpoq akuutissap cyanidip atorneqareertillugu aniatinneqartup sinnera, akuutissallu allat sinneri pinngortamut ajortumik sunniuteqassasut, ingammik akuuutissaq cyanid annertuumik toqunartulimmik akoqarmat.
Cyanid ima toqunartortaqartigaaq milligramimik ataatsimik oqimaassuseqartoq toqqusitineqarsinnaalluni, taamaattumik Inuit Issittormiut Siunnersuisoqatigiiffia ICC tusarniarneqarnerminni akissumminni cyanip atorneqarnissaanut mianersoqqussuteqarput.
Nalunaq Goldminemi teknikkikkut pisortaq Ture Grønlund radioaviisimut oqarpoq, akuutissaq cyanid annikitsuinnarmik atorneqartussaasoq, sinnikuilu qaqqap iluanut illersorneqarsinnaasumut inissinneqarumaartoq, cyanidillu atorneqartup sinnera mingutsisinnaajunnaarsinneqartartoq. Taamaakkaluartoq Pinngortitaq Avatangiisillu pillugit Peqatigiiffiup siulittaasua Mikkel Myrop oqarpoq, kuultip qaqqami piaarneqarnerani imeq atorneqarnertoq kuugunneqartarmat, piaaniartullu namminneerlutik oqartut, erngup kuuffissai marluk pilersaarutaasut taamaattumik akuutissap ulorianartup Cyanidip pinngortitamut mingutsisinnaanera mianernartoq. Kuultimik piiaanissamik qinnuteqartut Nalunaq Goldminep teknikkikkut pisortaa Ture Grønlund oqarpoq, cyanidip atorneqarneratigut mingugtsisisoqarnavianngitsoq. Nalunaq Goldmine akuutissamik cyanid-imik atortoqarluni kuultimik piaasinnaanera pillugu tusarniaaneq februaarip ulluisa 17anut killeqarpoq, maannakkkullu Namminersorlutik Oqartussat aalajangertussapput cyanid atorlugu piiasoqarsinnaanersoq.
