Akutaaneq Kreutzmann aamma angerlarpoq
30-nik ukiulik Akutaaneq Kreutzmann aningaasarsiutigalugu assammik arsartartuuneq unitsillugu aalajangerpoq ukiut qulit sinnerlugit pikkorinnerni Nunatta avataani unammisartooreerluni.
Qanittumi ilaquttat ikinngutillu qaninnerit aalajangernerminik ilisimatippai misigisimavorlu eqqortumik aalajangerluni.
- Nunatsinni tikeraarsimareerlunga ilaquttat ikinngutillu inuulluaqqusarnerat nuannertanngilaq. Misigisimavunga aamma ungasarneq ukiut kingulliit sakkortunerulersoq, Akutaaneq Kreutzmann KNR-mut oqarpoq.
Akutaaneq Kreutzmannip aningaasarsiutigalugu assammik arsartartuunini naggaserlugu Japanimi Toyoda Gosei Blue Falconimi ukioq unammisartuuvoq taakkulu pikkorinnerni unammisarput. Isumaqatigiissutilli ukioq ataaseq atuutereersup sivitsorneqarnissaa klubbip kissaatiginngilaa. Akutaaneq Kreutzmannip Europami klubbit arlaanni ingerlaqqinnissani isumaliutigilersimagaluarpaa.
- Sivisuumik aalajangerniarsarivunga. Nammineerlunga aamma misigerusukkakku eqqortumik aalajangerlunga. Angerlarusunneq ukiut marluk kingulliit eqqarsaatinniittarpoq misigisimavungalu angerlarnera eqqortumik aalajangernerusoq, Akutaaneq Kreutzmann oqarpoq.
Qatanngutigiit iligiittut
Angajua Angutimmarik Kreutzmann maaji naalersoq nalunaarpoq ukiut 15-it Danmarkimi nunanilu allani pikkorinnerit akornanni assammik arsartuuneq unitsillugu.
- Isumaqatigiippugut Maniitsumi iligiissalluta. Illoqarfimmut inunngorfinnut nuunnissara kissaatigaara angajoqqaakka nunaqqatigalugit angerlartutut misigerusukkama, Akutaaneq Kreutzmann naggasiivoq.
Taamaasillutik Maniitsormiut assammik arsarnermi GM novemberip aallartilaarnerani pisussatut pilersaarutaasoq pilerpat sakkortusiallattussanngorput. Maniitsormiut angutini inersimasuni 1986-mili pissartaatitaqarnikuunngillat taamanikkullu Akutaaneq aamma Angutimmarik Kreutzmannip ataataat iligiinni qitiusutut inissisimavoq.
