Akunnittarfiit Europami aaqqissuussinermut peqataalersut

Nunatsinni akunnittarfiit Hotelstars Unionimut peqataalernermikkut pitsaassusaat nunani 15-ini, ilaatigut Tysklandimi, Sverigemi Schweitzimilu akunnittarfinnut assersuunneqartalissapput.

- Tamanna akunnittarfiit nittarsaassinerinut ingerlatsinerinullu iluaqutissaqartaqassaaq, Christoffer Susé, akunnittarfiit peqatigiiffiannit HORESTA-meersoq oqarpoq.

- Hotelstars Union kinaassusersiunngitsumik nalilersuinissamik toqqammaveqarpoq. Tamannalu pitsaaqutaavoq, najugaqartussammi angalanermillu aaqqissuisartut taamaalillutik nunat killeqarfii pitarlugit pitsaassutsimik naliliinermik ataatsimoorussamik atugassaqartinneqassammata. Takornariat Nunatsinni akunnittarfinnut inniminniinnginnerminni pitsaassuseq qanoq ittuunersoq takusinnaalissavaat, Christoffer Susé taama oqarpoq.

Aamma atuaruk Nunatsinni akunnittarfinni unnuisartut amerlisimapput

Akunnittarfiit pitsaassusaannik naliliisarnermut peqatigitillugu akunnittarfiit ukiumoortumik naliliiffigineqartassapput, pitsaassuseq taamaaginnarnersoq qulakkeerniarlugu.

Hotelstars Unionimut peqataalernermut atatillugu aamma nutaanik allagartalersuisoqassaaq, nunat peqataasut tamarmik assigiimmik ilusilersukkamik ilisarnaateqartinneqassallutik.

Hotelstars Unionimi akunnittarfiit 16.382-it naliliiffigineqarsimapput, nunani peqataasuni 15-iusuni akunnittarfiit 44 procentii. Taakkununngalu ilaapput akunnittarfeqarnermi sallersaasut, Sverige aamma Tyskland.