Akuersissutit ukiunut tallimanut
Taamaalilluni Naalakkersuisut tapersersorneqassagunik ukiunut tallimakkaartunut pisassiissutinik tunniussisalerusupput. Maannakkut ukiumut pisassiissutit tunniunneqartartut:
- Ilaqutariinnut aalisartukkormiunut toqqissisimanarnerussaaq, takorlooruminarnerussaaq pilersaaruminarnerussallunilu isertitassamaatikka ukiuni aggersuni qanoq inissisimappat? Qitornama mikinerani isertitassakka qulakkeeqqavakka? Imaluunniit isertitassaqanngitsoorsinnaavunga?, Naalakkersuisut siulittaasuat Aleqa Hammond oqarpoq.
Aleqa Hammond isumaqarpoq ukiunut arlalikkaartunut pisassiisoqartalerpat aalisartumut pitsaasuusoq. Taamaaliornikkut aalisartup aalisarnini nammineerluni aqussinnaanerulissammagu pilersaarusiorsinnaanerulerlugulu:
- Aalisarnerup kipiluttunartumik inissisimasuarnera nammanneqarsinnaanngilaq. Naalakkersuisunut, innuttaasunut, aalisartunut Nunattalu Karsianut. Taamaattumik aaqqissuussinerup pisasseeriaatsillu allanngortinneratigut aalisartut nammineq ataasiakkaarlutik aalajangersorsinnaavaat ukiut tallimat taakkua iluani qanoq aalisarnissani sukkatigisumik arriitsigisumilluunniit ingerlatissanerlugu, Aleqa Hammond oqarpoq.
Ilulissani aalisartut piniartullu peqatigiiffiannit siunnersuut tigulluarneqarpoq:
- Tassa siornatigut taanna oqaatigisarnikuuaaa. Taannalu aalisartuniit soqutigineqarpoq maani aamma illoqarfimmi. Siumut pilersaarusiorsinnaaneq tassani takorlooruminarnerugami ukiuni tallimani siumut pisassat tunniunneqartartuuppata, Peter Olsen, Ilulissani aalisartut piniartullu peqatigiiffianni siulittaasoq oqarpoq.
