Akiuussutissaq nunatsinnut – immaqa – sapaatip akunnerata tulliani tikissaaq

EU-p Pfizerimit Biontechimiillu coronamut akiuussutissat ippassaq unnukkut kingusissukkut akuersissutigai.

Tamanna pissutigalugu akiuussutissaq Pfizerip Belgiami quersuanit lastbiilinut poortorneqaleruttorpoq, taannalu Danmarkimut juullip nalaani – kingusinnerpaamik sapaatip-akunnerata tulliani tikissalluni.

Tamatuma kingorna nunatsinnut nassiunneqassapput.

- Nalunaarutit ullormiit ullormut allanngortarput, kisianni maannakkutut isikkoqartillugu akiuussutissat siulliit sapaatip-akunnerata tulliani tikinnissaat naatsorsuutigaagut, nakorsaaneq Henrik L. Hansen oqarpoq.

- Immaqa kinguartilaarneqassapput.

-80 gradip missaani nillertigisumiitsinneqassaoq

Akiuussutissaq nunatsinnut tikittussaq siulleq Pfizerimeersuuvoq. Aallaqqaammut amerlavallaanik tikittoqassanngitsoq, nakorsaaneq naliliivoq. Akiuussutissarlu Pfizerimeersoq peqqinnissaqarfimmi sulisunit nakkutigineqarnissaa ajornaatsuinnaanngitsuuvoq.

Akiuussutissarmi -80 gradip missaani nillertigisumiitsinneqartussaavoq. Aasserneqariarluni immikkut ittumik kimikillisarneqartussaavoq – nakorsallu nillartaartitsivianiileruni ulluni tallimani uninngasinnaalluni.

AAMMA ATUARUK EU-p coronamut akiuussutissat akuerigai

- Danmarkimit 4000 kilometerinit ungasitsigisumit assartorneqarnissaa ajornakusoorpoq. Aamma nunatsinni sumiiffinnut tamanut, -80 gradit tikillugit qerititsivigineqarsinnaanngitsunut timmisartuunneqarnissaa naleqqutinngilaq, nakorsaaneq oqarpoq.

Akiuussutissalli aappaa aamma piariingajalerpoq. Taanna januaarimi nioqqutigineqalissasoq naatsorsuutigineqarpoq.

- Akiuussutissaq taanna aamma maannga apuutissasoq naatsorsuutigaarput, taannalu nakkutigiuminarneruvoq, Henrik L. Hansen oqarpoq.

Utoqqaat peqqinnissaqarfimmilu sulisut siulliullutik kapitissasut

Nunatsinni coronamut akiuussutissamik kapitittussaq siulleq qaqugorpiaq kapitissanersoq nakorsaanerup naluaa.

Danmarkimi Peqqinnissamut aqutsisoqarfiup piaartumik pinissaa naatsorsuutigaa. Danmarkimi aallaqqaammut aamma killilimmik amerlassuseqarnissaat naatsorsuutigineqarpoq.

Innuttaasut kommunini tuniluuffiunerpaajusuni paaqqutarinniffinni aalajangersimasuni 65-it sinnerlugit ukiullit napparsimaneq pissutigalugu aarlerinarluinnartumiittut peqqinnissaqarfinnilu paaqqutarinniffinnilu sulisut aalajangersimasut salliunneqassapput.

AAMMA ATUARUK Nakorsaaneq: Coronamut akiuussutissat 3.000-t nunatsinnut tikingajalerunartut

Nunatsinni aamma taamaattoqassasoq, Henrik L. Hansen oqarpoq:

- Napparsimalernissamut imaluunniit toqquteqarnissamut ilisimaateqarnerpaat, tassa utoqqaat salliutissavagut. Peqqinnissaqarfinnilli salliullutik aamma sulisut siulliutissallutigit, nakorsaaneq oqarpoq.

Norgemi Sverigemilu innuttaasutit siulliit decembarip ulluisa 27-anni akiuussutissamik kapineqarnissaat nalunaarutigineqarnikuuvoq.

EU-mi ataatsimiititaliarsuup siulittaasuata, Ursula von Der Leyenip akiuussutissamik kapisinerit EU tamakkerlugu decembarip ulluisa 27-anni aallartissasut aamma uppernarsarpaa.