Kapuutit imaasa Pfizer/BioNTechimeersut 975-it tikinneratigut nunatsinni akiuussutissamik kapuinissap immikkoortuisa aappaat aallartilerpoq.Assi: Ritzau Scanpix/Mads Claus Rasmussen

Akiuussutissamik kapuineq illoqarfinni nutaani pingasuni aallartinneqangajalersoq

Oqartussat akiuussutissamik kapuinerup immikkoortuata aappaa aallartippassuk Qaqortumi, Aasianni Sisimiunilu akiuussutissamik kapuisoqalissaaq.

Nunatta Danmarkimit akiuussutissat nassiunneqartut aappaat ullumi tigugai. Tamanna pissutigalugu Qaqortumi, Aasianni Sisimiunilu innuttaasut akiuussutissamik Pfizer/BioNTechimeersumik neqeroorfigineqarsinnaanngungajalerput.

Naalakkersuisut tusagassiuutinut nalunaarummi taama paasissutissiipput.

Akiuussutissamik kapuinerup immikkoortuani siullermi Nuummi Ilulissanilu paaqqutarinniffinni najugallit, 70-it sinnerlugit ukiullit, peqqinnissaqarfinni paaqqutarinniffinnilu sulisut kiisalu napparsimasut isumannarnerusut akiuussutissamik Pfizer/BioNTechimeersumik kaporneqarput.

AAMMA ATUARUK Nakorsaaneq akiuussuserneqarsimanermut uppernarsaat pillugu: Suli angunngilarput

Kapuinerup immikkoortuata aappaani periuseq taanna atorlugu Qaqortumi, Aasianni Sisimiunilu kapuisoqassaaq.

Illoqarfinni pingasuni taakkunani kapuutit imaat tikittut 975-iusut aallaqqaasiutigalugu agguaanneqassapput. Taakku Nuummi Ilulissanilu kapuissutigineqartut amerlaqatigaat.

Akiuussutissat Qaqortumukaanneqartut

Nakorsaanerup, Henrik L. Hansenip oqarnera naapertorlugu kapuutit imaat 975-it inunnut 1300-inut kapuinissamut naammapput. Nakorsaaneqarfiup Danmarkimit allanik akiuussutissarseqqingajalernissaq naatsorsuutigaa.

- Akiuussutissanik Danmarkimit pissarsinissarput apeqqutaavoq, tamannalu naatsorsuutigaarput.

Akiuussutissat siulliit nunatta kujataanut Qaqortumut ullumi pingasunngornermi tikinnissaat naatsorsuutaavoq, innuttaasunut sisamanngornermi tallimanngornermilu kapuisoqassaaq.

AAMMA ATUARUK Coronamut nutaamik akiuussutissaqalilertoq

Narsarsuarmili ullumikkut nuiammat timmisartoq Nuumminngaat aallassanersoq nakorsaanerup suli qulakkiinngilaa. Nakorsaanerullu timmisarput qaqugu kujammut aallassanera piffissami matumani aamma eqqoriarsinnaanagu.

- Silarluppat timmisartuutissanngilagut, akiuussutissat taakku arlaannit aallartinneqarneq ajuleratarsinnaanerat aarlerinartorsiortikkusunngilarput.

Akiuussutissammi uku nillertorujussuarmi uninngatinneqartussaapput.

Aasiannut Sisimiunullu sapaatip akunnerata tulliani nassiussisoqassasoq

Akiuussutissat Aasiannut Sisimiunullu sapaatip-akunnerata tulliani aatsaat nassiunneqassapput.

- Silap qanoq innissaa ilisimaneqarsinnaanngisaannarpoq, timmisartulli pilersaarutit malillugit sapaatip-akunnerata tulliani aallarsinnaanissaa neriuutigaarput, nakorsaaneq oqarpoq.

Akiuussutissamik pissarsisinnaaneq annertusiartortillugu akiuussutissamik kapuinerup immikkoortui 1-imit 4-mut annertusiartortinneqassapput, tassa innuttaasut 18-ileereersimasut tamarmik akiuussutissamik kapitinnissamik neqeroorfigineqarsinnaaleriartussapput.

Akiuussutissamik kapitinnissannut tullinnguukkuit kapitinnissamut neqeroorfigineqarlutik peqqinnissaqarfimmit saaffigineqassaatit.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat