Akiuussutissat Qaqortuliaanneqarnissaat silarlunnera pissutigalugu kinguartittoq

Coronamut akiuussutissat Qaqortumut ippassaq pingasunngornermi tikiunneqartussaagaluarput.

Tamannali sila pissutigalugu unitsinneqarpoq.

Taamaammat Qaqortumi akiuussutissamik kapuinissat sapaatipakunneranut 4-mut, tassa sapaatit akunnerinik marlunnik kinguartinneqarpoq. Naalakkersuisut tusagassiuutinut nalunaarummi paasissutissiipput.

Qaqortumi akiuussutissamik kapuinerit sapaatip akunnerani matumani sisamanngornermi tallimanngornermilu aallartinneqartussaagaluarput.

”Kapuinissap kinguartinneqartariaqalernera uggornartorujussuuvoq, kisiannili akiuussutissat tamaangaannassappata suli uggornarnerusussaavoq”, Naalakkersuisut tusagassiuutinut nalunaarummi allapput.

Akiuussutissat suliffeqarfinnit Pfizerimeersut BioNTechimeersullu uninngatinneqarnerminnik assartorneqarnerminnilu nakkutigineqangaatsiartussaapput, taamaammat sumiiffimmit sumiiffimmut assartorniarnerat ajornakusoortorujussuuvoq.

AAMMA ATUARUK Akiuussutissamik kapuineq illoqarfinni nutaani pingasuni aallartinneqangajalersoq

Akiuussutissat aserussanngikkunik, qerititsivinnit qaqinneqareeraangamik assartorneqarnissaminnullu poortorneqareeraangamik piffissap sivikitsuinnaap ingerlanerani atorneqartussaapput.

Taamaattumik akiuussutissat assartorneqarnerminni ingerlaqqissinnaajunnaaratarsinnaammat timmisartoq Nuummiit aallartinniarneqanngilaq.

Sisimiut aamma Aasiaat pilersaarut malikkaat

Sisimiuni Aasiannilu akiuussutissamik kapuinissamut pilersaarut malinneqarpoq. Akiuussutissat sumiiffinnut taakkununnga sapaatip akunnerata tulliani tikissapput.

Akiuussutissamik pissarsisinnaaneq annertusiartortillugu akiuussutissamik kapuinerup immikkoortui 1-imit 4-mut annertusiartortinneqassapput, tassa innuttaasut 18-ileereersimasut tamarmik akiuussutissamik kapitinnissamik neqeroorfigineqarsinnaaleriartussapput.

Akiuussutissamik kapitinnissannut tullinnguukkuit kapitinnissamut neqeroorfigineqarlutik peqqinnissaqarfimmit saaffigineqassaatit.