Ilanngaaserisut ikiaroornartumik arsaarinnissuteqarnerusimasut
Ikiaroornartut aningaasallu nunatsinni ilanngaaserisunit arsaarinnissutigineqartartut amerliartorput.
Aningaasaqarnermut naalakkersuisoqarfiup § 37 naapertorlugu apeqqummut akissutaani tamanna erserpoq.
Ikiaroornartumik 2019-imi 97-eriarluni arsaarinnissuteqartoqarpoq, taakkualu 39 kiiluupput. 2018-imilu arsaarinnissutigineqartunit 1,3 kiilumik oqimaannerupput.
Umiarsuit nakkutilliivigineqartut amerlisut
Aningaasallu nunatsinnit anngiortumik anniseriarneqaraluartut malunnartumik amerlipput. 6,6 millionit koruunimmi 2019-imi arsaarinnissutigineqarput, taakkualu ukiup siulianit 4 millionit koruuninik amerlanerupput.
Ilanngaaserisut umiarsuakkut timmisartukkullu nassiussanik misissuisarput, ingammillu umiarsuit nakkutilliivigisartagaat amerlillutik.
Ilanngaaserisut umiarsuit 2018-imi nakkutilliivigisimasaat tallimaapput, 2019-imilu 22-ullutik.