Akitsinnguaq Olsen Inatsisartunit sulinngiffeqarallassaaq
- Qasusarunnaarsarnissani pissutigalugu Akitsinnguaq Olsen Inatsisartunit sulinngiffeqarallassaaq, Siumumi allatsi Mikael Petersen AG-mut oqarpoq.
Sukumiinerusumik oqaaseqarsinnaannginnerarpoq, Akitsinnguaq Olsenilli novembarip aqqaneq-aappaanni sulileqqinnissaa taassuma ilimagaa.
Akitsinnguaq Olsen Inuit Ataqatigiinniit Siumumut oktobarip qulingiluaani nuuppoq. Akitsinnguaq Olsenip Inuit Ataqatigiinnit tunuarnermini pissutsit marluk isornartoqartippai:
- Inersuarmi oqallinnermi Inuit Ataqatigiinneersut oqaaseqarpiarneq ajorput. Apeqquteqarnissamut periarfissinneqarnermi, inuit ataasiakkaat kisimik oqaaseqarsinnaasarput, Akitsinnguaq Olsen oktobarip qulingiluaani oqarpoq.
Inatsisartunut ukioq manna qinersisoqarmat Akitsinnguaq Olsen, Inuit Ataqatigiit sinnerlugit 112-init qinerneqarpoq.