Akit pillugit misissuineq KNAPKp saqqummiutissavaa

Aalisakkat aningaasarsiornermi tunngavigineqartut akii pillugit misissuinermit angusat KNAPKp ullumi saqqummiutissavai. KNAPK siorna taamatut misissuivoq tutsuiginassutsimigut apeqquserneqartumik. Taamanikkut GA aamma aalisarnermi aningaasarsiorneq pillugu Syddansk Universitetimi ilisimasalik naliliipput taamanikkut misissuineq tutsuiginassuseqanngitsoq. Taamaattoq GEMBA Seafood Consulting suleqatigalugu KNAPK akinik misissueqqippoq.
Allattoq Peter Troelsen, Noah Mølgaard
septembarip 13-at 2012 06:47

Ukiormanna misissuinermi KNAPKp GEMBA Seafood Consulting sulinerani malittareqqisaarsimavaa misissuinermit nalunaarutip kukkuneqannginnissaa anguniarlugu.

- Ukiormanna misissuinerup kukkuneqannginnissaa assut eqqummaariffiginiarsimavarput. Oqarsinnaavugummi siorna misissuineq saqqummermat oqaluttoqartoq iipilit pærinut assersuunneqartut, ukiormannali tamanna avaqqunniarparput. Nunani tamanaani najoqqutarineqartartut malippagut paatsuuinerit pinngitsoorniarlugit, KNAPK-miit Tønnes OK Berthelsen oqarpoq.

Akinik misissuineq atorlugu ersersinniarneqarpoq nunanut Islandimut Norgemullu sanilliullugit Nunatsinni aalisartut akilersorneqarnerat qanoq inissisimanersoq.

- Ataatsimut isigissagaanni takuneqarsinnaavoq Nunatsinni tunisinermi akit nunanut sanilerisatsinnut sanilliullugit appasinnerusut. Taamaattumik isumaqatigiinniarnissani unammilligassaqarpugut. Tassa imaappoq tunisinermi akit qaffariartorpiaratik inissisimanerat allanngortinniarlugu unammilligassaqarpugut, Tønnes OK Berthelsen oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq