Akisussaaffiit tigoriikkat inatsisitigullu ataataqanngitsut naalagaaffeqatigiinni siuttut eqqartoraat

Naalagaaffeqatigiinni siuttut, tassalu nunatsinnit Aleqa Hammond, Danmarkimit Helle Thorning-Schmidt aamma Savalimmiunit Kaj Leo Holm Johannesen Savalimmiuni naapisimaarnerat ippassaq aallartippoq.
 
Nunatsinnit oqaluuserisassanngortitanut ilaapput inatsisitigut ataataqanngitsunut tunngasoq kiisalu akisussaaffinni tigoriikkani naalagaaffeqatigiinnit akuliunniartoqartarnerannut tunngasoq.
 
Ippassaq ullumilu takornarniarnermut atorneqarput, tassani imminut ilisareqatigiinnerulernissaq qanillinerulernissarlu siunertarineqarput. Naalagaaffeqatigiinnermi nunat siuttuisa ataatsimiinnerat aqagu aallartissaaq, tassanilu tamarmik immikkut oqaluuserisassanngortitsisimapput.
 
Naalakkersuisut siulittaasuat Aleqa Hammond oqarpoq nunatsinnit oqaluuserisassanngortitat tassaasut akisussaaffinni tigoriikkani Danmarkiminngaannit akulerunniartoqartarnerannut tunngasoq kiisalu inatsisitigut ataataqanngitsitsisimanerup taassumalu nassatarisaanut tunngasut.
 
-Akisussaaffinnik tigusisoqarsimatillugu Danmarkiminngaannit imaluunnit naalagaaffeqatigiinnit akulerunniartarnermut apeqqutit qaqikkusutakka oqaluuserisassanngortinnikuuakka. Taassuma saniatigut inatsisitigut ataataqanngitsitsisimanerup taassumalu nassatarisaanik eqqornerlunneqarsimasut pillugit oqariartuutigissavara naligiimmik innuttaasut pineqarnissaat naalagaaffeqatigiinni isumaqatigiissutigissagipput, Aleqa Hammond erseqqissaavoq.
 
Aamma oqarpoq, nunat tamarmik aningaasaqarnikkut ineriartornerat oqaluuserineqassasoq. Savalimmiut, Norge aamma EU avaleraasartoorniarnermik isumaqatigiissuteqarsimanerat nunatsinni upernaap ingerlanerani oqaluuserineqangaatsiarsimaqisoq taamatuttaaq uranimut tunngasoq Danmarkip nunattalu isumaqatigiinngissutigisarsimasaat naalagaaffeqatigiit siuttuisa ataatsimiinnerminni oqaluuserisassaannut ilanngunneqarsimanngillat.
 
Tamakkununnga tunngasut naalagaaffeqatigiinnermut toqqaannartumik attuumassuteqanngimmata oqaluuserisassanngortissimanagit Aleqa Hammond erseqqissaavoq. Naatsorsuutigaali inatsisitigut ataataqanngitsunut tunngasut pillugit Savalimmiormiunit taperserneqassalluni. Apeqqut tamannarpiaq aamma pillugu Danmarkimi naalakkersuisut siulittaasuat oqaloqatigissamaarnerarpaa.
 
-Ataatsimiinnerup kingunerisaanik immitsinnut qanilliallannissarput ilimagaara, ikinngutigiittut naapippugut aamma nunat aquttuatut immitsinnut ilisarisimallualernissarput siunertaavoq. Taamaattumik ilaqutariippalaartumik ikinngutigiippalaartumillu ulloqartarnerput assorsuaq iluaqutaavoq, Naalakkersuisut siulittaasuat oqarpoq