Akissaatillit akissaatikinnerillu isumaqatigiinngillat
Innuttaasut ima oqarput:
- Assorsuaq iluaangivara, paasingakku qaffanniartoq. SIK malillugu aningaasarsiaqarluni meeqqerivimmiittuuteqarluni eqquinngittoornavianngilaq, assorsuaq iluaangivara, Karen Cortzen meeqqerivimmiunik aneerusseqataasoq isumaqataannginnini pillugu taama oqarpoq. Amalie Hansen utoqqalinersiutisiaqartoq aamma isumaqataanngilaq.
- Isumaqataavallaanngikkaluarpunga. Utoqqalinersiuteqarluni, sipaarluni suliffeqarani akileraartuarneq eqqarsarnartoqarami. Nalunngikkaluarparpummi suna tamarmi akilik, kisianni suliffeqaranilu qaammallu naatsiijusaartarlugu apeqqusernartarpoq taamannak tusarluni, aamma suliffeqaratalu malinnaajuassuugut tamaanga.
Laarseeraq Eriksen aamma utoqqalinersiuteqarpoq, sipaarniarnerup qaavatigut aamma akileraarutinik qaffaasoqarnera akuersaarumanngilaa.
- Aamma maannakkut utoqqaat taavalu innarluutillit sipaarniarfigineqarnerat peqqutigalugu juullerpalaartumilluunniit takutiffigisinnaaneqarsimanngillat. Uannut annernartorujussuuvoq. Akileraarutit qaffanneqarnerat uannut sunniuteqassaaq, utoqqalinersiutikka apparujussuassapput inuuniarninnut assigisaanullu.
Akissaatikinnerusut apersorneqartut akileraarutip qaffanneqarnissaannut akerliupput. Aammali akuersaartoqarpoq, Abelone Grønvold Olsen aamma Paaviaaraq Olsen ima oqarput.
- Tassami siuarsaassagaanni illoqarfitsinni, illoqarfippassuit nunaqarfiillu siuarsagassat, sanaartornikkut tunngatillugu uanga ajoriffissaqartinngilara. Taava naatsorsuutigaara 1 procentit taakkununnga atorneqassasut, Abelone Grønvold Olsen oqarpoq.
- Uanga akileraarutit qaffanneqarnissaat ajorinngilara aamma pisariaqarpoq ullutsinnut malinnaanissaq. Taavalu aningaasarsiornikkut akisussaaffimmik aamma tigusisariaqarpugut.
Illit aningaasivinnut sunniuteqartussaassua?
- Tassami sunniuteqartussaagaluarpoq, kisianni aamma eqqarsaatigisariaqarparput piorsaaniarutta arlaatigut nammineerluta aamma pilersitsisariaqarpugut, Paaviaaraq Olsen oqarpoq.
