Akisoorsuusariaqanngilaq

"Rough. Real. Remote".

Taama taaguuteqarpoq takoqqusaarneq Destination Arctic Circle-p upernaaq aallartitaa. Tassani ilaatigut filmit naatsut arfinillit suliarineqarput qimussernermut, snescooterernermut, sisorarnermut, illoqarfimmi inuunermut, nunaqarfimmi inuunermut, apummi tummarneqarsimanngitsumi sisorarnermut sermersuarmiinnermullu tunngasut.

Ukiup affaata ingerlanerinnaanni filmit naatsut taakku inunnit assigiinngitsunit 15.000-nit nunanit assigiinngitsunit 70-it takuneqarsimapput. Taamaasillutik suliniummik ingerlatsisut Air Greenland, Grønlands- Turist- og erhvervsråd aamma Destination Arctic Circle anguniakkaminnik naammasinnipput - tassa qeqqani takornariarnissamut periarfissat inunnut amerlasuunut nittarsaannissaat.

- Toqqaannartumik uuttorneqarsinnaanngikkaluarpoq qeqqanut takornariat amerleriarsimassanersut, Mads Pihl Destination Arctic Circle-imiit KNR-imut oqarpoq.

- Kisianni suliniut piffissami ingerlasussaq aallartinneqarpoq. Takornariartitsivissuit ilaatigut piffissiaq sivisujaaq aalajangerniaasartarput angallavimmut nutaamut tuniniaalinnginnerminni, Mads Pihl oqarpoq.

Taassuma nunatsinni takornariarfissanut allanut innersuukkusuppaa nittartakkat atorlugit takoqqusaarnissaq. Misilittagarilersimasatik maanna bloggimut ikivaat http://blog.arcticcircle.gl/-mut taannalu tuluttuinnaq allaqqavoq.

- Takornariarfissat nittarsaannissaanut suleriaaseq taanna pitsaavoq, Mads Pihl oqarpoq ilanngullugulu oqaatigaa filmiaqqat arfinillit sananerannut 140.00o koruunit missaat atorneqarsimasut.

- Tamanna akisugisassaanngilaq suliffeqarfiit pingasut aningaasartuutinik avitsisussaanerat eqqarsaatigalugu, Mads Pihl oqarpoq.