Akilinermi tuttut amerliartoqqilerput
Tuttut tamaaniittut ikiliartorsoralugit ernummatigineqartaraluarput. Ikiliartoratilli amerliartortut kisitsisit nutaat ersersippaat.
Ukiut qulit matuma siornagut kingullermik sukumiisumik kisitsisoqarmat, tuttut 123.000-t missaanniissangatinneqarput. Kisitsisoqarnerani nutaami, suli naammassineqanngitsumi tuttut taakkunannga amerlanerussasut paasineqarpoq. Alaskamiu biologi, Beth Lenart, uumasunik nujuartanik isumaginnittuusoq, CBC News-imut oqarpoq, kisitsinerit siulliit timmisartumit ingerlanneqartut maanna paasinarsisikkaat, tuttoqatigiit Porcupine-mik taaneqartartut 123.000-init amerlanerusut, kisitsinerillu naammassineqarpata tuttut naatsorsuutigineqartumit amerlanerunissaat ilimagineqartoq.
Canadami sumiiffinni allani tuttut ikiliartormata, tuttoqatigiit Porcupinemik taaneqartartut ikileriarsimanissaat ernummatigineqaraluarpoq, maannali amerleriarsimanerat nuannaarutigineqaannarsinnaavoq.
Yukonimi naalakkersuisut ukiut marluk matuma siornagut tuttunik killilersuineq aallartippaat, killilersuinerlu tamanna piniartunit nuannarineqanngeqaaq. Taamaattorli immaqa killilersuisoqarneratigut tuttut Yukonip Alaskallu killeqarfiisa eqqaaniittut amerleriarsimanissaat ilimagineqalerpoq.
Tuttut kisinneqartut qanorpiaq amerlassuseqarnersut marsimi tamanut saqqummiunneqassaaq.
