Akiliivallaartinneqartarsimasoq ombudsmandip taperserpaa

Ilinniartup ilinniarnerminut atatillugu Nuummiinnermini meeqqaminik paaqqinnittarfimmi Tikiusaamiititsisarnera, Namminersornerullutik Oqartussat 2008-imi qaammammut 5000 koruuninik akiliisitsisarsimanerat inatsisitigut unioqqutitsinerusoq, inatsisartut ombudsmandiata aalajangerpaa.
Allattoq Jaaku Lyberth
septembarip 24-at 2009 10:49

Taamatut aalajangiineq pivoq ilinniagaqartup naammagittaalliuuteqarnerata kingorna.

Atuisunut akiliuteqartitsinissaq inatsisini ersarissumik tunngavissaqartariaqartoq Ombudsmandip naliliinermini erseqqissarpaa, suliamilu pineqartumi taamaattoqanngitsoq nalilerlugu, tamannalu innuttaasunik assigiinngitsumik pinninnermik kinguneqarsinnaasoq oqaatigaa.

Tikiusaami meeqqanik paarsinermi akiliuteqartarnissaq inatsisartut akuersissutiginikuunngilaat, meeqqanut paaqqinnittarfik Tikiusaaq ilinniagaqartut najugaqarfigisaannut atammat. Taamaattumik ilinniagaqartup meeraarisami paaqqinnittarfimmiittarnerannut akiliutigisimasani utertittussanngorpai, ombudsmandip aalajangernerata kingorna.

Ilinniagaqartut allat meeqqaminnik Tikiusaamiititaqarsimasut akiliuteqartarsimasullu akiliutigisimasatik utertissinnaavaat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq