Akileriilluni oqallittarneq pingaaruteqarpoq
Partiimmi annersaat marluk oqallitsinneqartarneri KNR-ip qinersinermut atatillugu paasissutissiisarnerannut ilapittuutaasarpoq, taamaasiortoqarneratigummi kikkut, qanorlu nunatsinni aqutsinialersaarnersut oqallitsinneqaraangata paasinarsisittarmagu.
- Partiit annerit marluk siunissamut takorluugaat tassani itisilersinnaasarmassuk pingaaruteqarpoq. Partiimmi annerit marluk arlaat siuttunngortussaanera ilimanarsereertarpoq, tamaalillunilu ukiuni tullerni sisamani akisussaasussaassallutik, KNR-ip Nutaarsiassaqartitsivianni qullersaaasoq Mikkel Bjarnø Lund oqarpoq.
AAMMA ATUARUK Qineqqusaarneq pikkunartoq KNR-imit malinnaaviginissaa maanna piareerpoq
Qinersisoqalernerani arfineq marloriarluni qinersisartunik ataatsimiititsinerit KNR-ip ingerlattarpai, oqallinnerit sisamat aammalu partiit siuttuisa tamarmik peqataaffigisaannik oqallittoqartarluni, akileriisillugit oqallitsitsinerit saniatigut ulloq qinersiviusup unnukkuutaani immikkut ilisimasalinnik peqataasoqartillugu aallakaatitsisoqartarluni.
- Partiit tamavimmik qineqqusaarnerup nalaani oqariartuutiminnik apuussinissaannut periarfissaqarput, taamaammallu qinersisoqarnissaata sukumiisumik sammineqarnissaa isumaga malillugu qulakkeertarlutigu. Akileriilluni oqallittarnerit matumani qinersisartunut tapertaalluartutut taasariaqarpoq, tassa partiinik immikkoortitsisoqarani. Mikkel Bjarnø Lund oqarpoq.
KNR-ip qinersinissamut samminninnera tamarmi knr.gl -imut iserlutit malinnaavigisinnaavat, ulluinnarnilu qinersinissaq pillugu KNR-ip Radioatigut TV-atigullu sammineqarsinnaallunittaaq.
