Akileraarutit taamaaginnassangatippaat

Aappaagu akileraarusigassanut ilaanngaataasartut allanngortinneqannginnissaannik Inatsisartut upernaakkut ataatsimiinneranni Naalakkersuisut siunniussaqarput. Imaluunniit Naalakkersuisut saqqummiinerattut: Ilanngaatit qaffasissusaannik allaannguisoqassappat taanna Akileraartarnermut aamma Atugarissaarnissaq pillugu Ataatsimiititaliarsuup isumaliutissiissutaata inernera utaqqineqaqqaassaaq.

Taanna utaqqeqqaarneqarpat ima paasineqarsinnaavoq, tassa akileraarutinik allannguisoqassappat aatsaat tamanna 2013-imi pisinnaassasoq.

Aappaagumut allannguinnginnerit siornamut assingussapput, tassa akissarsiat ilanngaataat ukiumut 48.000 koruuniuginnassalluni aalajangersimasumillu ilanngaat ukiumut 10.000 koruuniussalluni. Akissarsiat saniatigut B-mik isertitanik taaneqartartunut ilanngaat 5.000 koruuniuginnassaaq aamma killilimmik isertitaqartartunut ilanngaat ukiumut 1.000 koruuniuginnassalluni.

Kommuninut tunngatillugu ataatsimoorussamik akileraarusiunneqartartoq 6 procentiusoq aappaagu allanngortinneqassanngilaq aamma nunamut tamarmut akileraarut 11 procenti taamaaginnassaaq, soorluttaaq nunamut immikkut akileraarutaasartoq 26 procentimiiginnartussaasoq.

Akitsuusiinermut politikki qanoq ingerlanniarneqarnersoq suli nalunarallarpoq. Taamaattoq Akileraartarnermut aamma Atugarissaarneq pillugu isumalioqatigiissitap siulittaasua, professor Torben M. Andersenip siusinnerusukkut nalunaarutigaa, atuinernut akitsuusiinermi nunatta karsianut isaatitsisoqarsinnaasoq.