Akileraarutit sippuutaannit utertoorutissat qaammat naappat akilerneqassapput

Nunatsinni innuttaasut 23.000-ingajaat akileraarutit sippuutaannit utertoorutissat 153,3 mio. koruunit avittussaassavaat. Taamaattorli... Akileraartarnermut Aqutsisoqarfiup pisortanut akiligassanut kinguaattoorutinut 44 mio. koruunit missaat matussutissatut ilanngaatigissavai. Tassalu Namminersorlutik Oqartussanut, Kommuninut, INI-mut, kommunit inissiiaatileqatigiiffiinut Nukissiorfinnullu.

Akileraartarnermut Aqutsisoqarfiup tusagassiorfinnut nalunaaruteqarluni erseqqissaatigaa, akileraarutit sippuutaannit utertoorutissat tamakkiisumik ilaannakortumilluunniit akiligassanut kinguaattoorutaasunut matussutigineqassappata tamanna nalunaarutigineqarumaartoq.

Taava aamma ilaqarpugut akileraarnikippallaarsimallutik akiligassinneqartussanik. Ukiormannalu akileraartartut 9.560-it 154,3 mio. koruuninik akiligassaqarput. Taakkunannga 44,5 mio. koruunit 2014-imut siumoortumik nalunaarsuinermut atatillugu ilanngunneqassapput, 109,8 mio. koruunillu pingasunngorlugit avillugit akiligassanngussallutik - taakkulu ukiormanna ulluni septembarip aallaqqaataani, oktobarip aallaqqaataani aamma novembarip aallaqqaataani akilerneqassapput, Akileraartarnermut Aqutsisoqarfik tusagassiorfinnut nalunaaruteqarluni taama allappoq.

Atuartullu ilaasa maluginiarunnarsivaat akileraarutit sippuutaannit utertoorutissat akileraarutissallu sinnerisa aningaasartaat assigiiffaarimmata - tassalu tamarmik 154,3 millioniullutik.

- Aatsaat taama pisoqarunarpoq, Akileraartarnermut Aqutsisoqarfimmi pisortaagallartoq Kim Neumann Nielsen Radioaviisimut taama oqarpoq.