Akileraarutit apparneqarnissaat Demokraatit piumasaqaatiginiaraat
Taamatullu nalunaaruteqarneq Niels Thomsenip Facebookimi videokkut saqqummiuppaa qulequtserlugu 'Naalakkersuisooqataassagutta piumasaqaatissatta ilaat: Akileraarut apparneqassasoq'.
Videomi ima itisiliivoq:
- Qinersereernerup kinguninngua partiit akunnitsinni isumaqatigiinniarnerit aallartittussaavagut. Uagut Demokraatininngaanniit nalunaarutigerusupparput isumaqatigiinniarnerni piumasariniarlugu akileraarutit apparneqarnissaat - nuna tamaat akileraarut appartariaqarpoq, Niels Thomsen taama oqarpoq.
Qinersisartunik isumasiuinerit kingullersaat naapertorlugu Demokraatit taasinerit 18,8 procentii pissarsiarissavaat. Tamannalu eqquutissappat partiit Inuit Ataqatigiit Atassullu peqatigalugit naalakkersuisunik pilersitsisinnaapput, partiit taakku pingasut katillugit 17-inik ilaasortaatitaqarsinnaassammata.
