Akileraarut 37 procentimut appartariaqarpoq
Akileraartarnermut ataatsimiititaliarsuaq nalunaarusiaminik ullumikkut saqqummiisussaq aalajangiisussaasuuguni isertitanut akileraarut appartissagaluarpaa.
Isertitanut akileraarut 37 procentimut appartinneqassasoq siunnersuutigaat, akerlianilli isertitat allat ullumikkut annikitsuinnarmik akileraarutaasartut imaluunniit akileraarutaaneq ajortut akileraarutaanerulissapput.
Tamakku atuarneqarsinnaapput ataatsimiitaliarsuup nalunaarusiaani "Pigissaanerput atugaarissaarnerpullu"-mi ullumikkut saqqummiuneqartussami.
Akileraarutit apparneratigut qulakkeerniarneqarpoq sulinerup imminut akilersinnaanerulernissaa. Aammattaaq anguniarneqarpoq nunatsinni akileraartarnermut malittarisassat ataatsimiititaliarsuup naliliinera malillugu ersernerluttut iluarsineqarnissaat.
Akileraarulli apparpat imaanngilaq sulinngiffeqarluta angalanissamut akissaqarnerulissasugut tassami pisortanut akiliutivut allat qaffanneqassasut siunnersuutigineqarpoq.
Siunnersuutigineqartut ilagaat soraarnerussutisiaqalernissamut ileqqaagaqarnissaq kikkunnut tamanut piumasarineqalissasoq aamma suliffeqarfiutillit eqqarsaatigalugit aammagooq avatangiisinut akileraarnerulissaagut.
Aamma ataatsimiititaliarsuup inassutigaa isumaginninnermi ikiorsiissutit akileraarutaasalernissaat aammattaarlu siunnersuutigalugu nammineerluni inigisani iluanaarutit akileraarutaasalernissaat.
Akileraartarneq atugarissaarnerlu ataatsimiititaliarsuup inassutai aatsaat piviusunngorsinnaapput Inatsisartuni amerlanerussuteqartunit taperserneqarunik.
