Akileraartarneq atugarissaarnerlu pillugit isumalioqatigiissitat aallarteqqajaapput

Aningaasaqarnermut naalakkersuisoq, Palle Christiansen, aamma isumaginninnermut naalakkersuisoq, Maliina Abelsen, isumalioqatigiissitanut suliakkiummik oqasertaleereersimapput. Suliassami akileraartarnermut atugarissarnermullu tunngasut ataqatigiissinneqassapput, soorluttaaq ineqarneq ineqarnermilu tapit aamma sammineqassasut.

Inuit piukkunnartut aamma allattorneqareersimapput, taakkualu Naalakkeersuisunit tamarmiusunit naggataatigut akuerineqassapput.

- Naalakkersuisut akuersereerpata, inuit pineqartut soqutiginninnersut aperineqassapput, aningaasaqarnermut naalakkersuisoq oqarpoq.

- Naatsorsuutigaarput, siulittaasoqarfeqassasoq, tallimanik arfinilinnilluunnit ilaasortaqartumik, taakkualu naalakkersuisoqarfinni assigiinngitsuni atorfilinnik sulisitsisassapput, soorluttaaq Danmarkimi immikkut ilisimasalinnut saaffiginnittarsinnassasut.

Taakkua saniatigut soqutigisaqaqatigiit assigiinngitsut tusarniaaffigineqartassapput. Tassalu isumalioqatigiissitani toqqaannaartumik ilaasortaatitaqassanngillat, aggersarneqartassallutilli, Palle Christiansen oqarpoq.

- Akilerartarneq atugarissaarnerlu pillugit isumalioqatigiissitassap soqutigisalinnik assigiinngitsunit oqqaffiunissaa siunertarinngilarput. Piffissaqanngilavut piffissaajarusunnatalu. Tassalu inuttakitsunnguamik piginnaasaqarluartunilli siulittaasoqarfiliussaagut, aningaasaqarnermut naalakkersuisoq oqarpoq.

Naalakkersuisut siunertarisimagaluarpaat, isumalioqatigiissitat ukialiinnartoq aallartissasut, taamaalillutik septembarimiit januaarimut nalunaarusiap immikkoortuanik siullermik naammasisaqarniassagamik, Naalakkersuisullu kinguninngua iliuseqarsinnaaniassammata.

- Suleqataatikkusutavulli ilaarusunnerlutik qagugu akissanersut apeqqutaavoq. Akilertorpatami piffissaliussavut malissinnaavagut.

- Ungasinnerusoq eqqarsaatigalugu siunertaraarput, isumalioqatigissitat inassutaat 2011-mi aningaasanut inatsimmi tamakkiisumik malunniutissasut, aammalu inuiaqatigiit aaqqissuussaanerani periaasissanik ukiuni 20-ni 30-ni atuussinnaasunik maleruagassiissasut, aningaasaqarnermut naalakkersuisoq Palle Christinasen oqarpoq.

Aamma aningaasaqarnermut siunnersuisoqatigeeqalissaq. Aamma taakkua inuttassaqartinneqareerput, aammali taakkua sulinngiffeqarneq pissutigalugu suli akinngillat. Kikkuussanersut Palle Christiansen oqaatigiumanngilaai. Kisianni oqarpoq, ilaat tupaallassaqqaarput.