Akiitsut 1,1 milliardit akilersinniarpaat
Inuit, suliffeqarfiit peqatigiiffiillu katillugit 25.000-it akiligassaqarput. Akiitsut Namminersorlutik Oqartussanut akiligassaapput, taakkulu Akileraartarnermut Aqutsisoqarfiup akiitsulinnut akilersinniartussaavaat.
Akiligassat katillugit 1,1 milliard koruuniupput, aningaasat amerlagineqarsinnaagaluartut, taamaattorli ingasagisassaanngitsut Akileraartarnermut Aqutsisoqarfiup pisortaata, Morten Kahlkep oqaatigaa.
- Akiliisitsiniartartutut suligaanni suliffissaarukkallartoqarsinnaanngilaq. Akiligassanik akiliisitseriaaseq nutaaq toqqammavigalugu sulivugut. Akiligassat amerlisimasut oqarsinnaanngilanga, tassami qangali taamaaginnangajattuupput, Morten Kahlke oqarpoq.
Akiitsut 1,1 milliard koruunit ilagaat akiitsullit akiligassaat, ilaatigut tassaasut: Kommunenut Namminersorlutik Oqartussanullu akileraartarnikkut akilinngitsuukkat, illulioreernerup kingorna taarsigassarsiniarnermi akilinngitsuukkat aamma ilinniagaqarnermi taarsigassarsiat ilinniareernerup kingorna taarsigassaagaluit. Akiligassalli amerlanersaat suliffeqarfiit akileraarutinut akilinngitsuugaraat.
Nunarsuatsinni aningaasarliornerup kinguneranik suliffeqarfinnit akiitsorineqartut akilersinniarneri Akileraartarnermut Aqutsisoqarfimmut ajornarnerusimavoq.
- Sulisitsisut suliffeqarfiillu akiitsui piffissap sivikitsunnguup ingerlanerani akilerneqarsinnaanngillat, tamannalu eqqummaariffigaarput. Taamaattumik akiligassaasa amerlinnginnissaat eqqarsaatigalugu taakkua malittareqqissaarpavut, Morten Kahlke naggasiivoq.
