Akiitsorpassuavut Inatsisartut aningaasaqarnermut ataatsimiititaliaata narrutsaatigai.
Kalaallit 14-nit sinnerlugit ukiullit agguaqatigiissillugu tamarmik pisortanut akiitsoqarput 22.000 koruuninik.
Tamanna ajorluinnarpoq, aningaasaqarnermut ataatsimiititaliami ilaasortat taama isumaqarput.
Innuttaasut akissaqaraluarlutik akileraarutinik, akitsuutinik sianiinaarniarsarippata, nunatta karsianit attartukkanut akiliiumanngippata, akileraarutinik A-nik, aamma eqqaanermut akiliiumanngippata, taava inuiaqatigiinnit tillittutut assersuunneqarsinnaapput.
Akiitsut amerlasuut akuerineqarsinnaanngitsut pissuteqarput innuttaasut amerlasuut akiliiumassuseqarneq ajornerat, aningaasaqarnermut ataatsimiititaliaq allappoq.
Taamaattumik ataatsimiititaliaq inerniliivoq pissutsimik allanngortiutsisariaqarlutik. Akileraarutinik aqutsisoqarfimmi allannguinikkut ajornartorsiut anigorneqarnavianngilaq. Akiliinerlunnermik ajornartorsiut innuttaasut pissussaanik allanguinikkut aatsaat allanngortinneqarsinnaavoq.
Maani inuiaqatigiinni innuttaasutut ataatsimut pisussaaffilertariaqarpugut innuttaasuniit akileerusussusilinnit mipperneq akuerinagu, aningaasaqarnermut ataatsimiititaliaq innuttaasunut naveersinerminni allappoq.
Aningaasaqarnermut ataatsimiititaliami ilaasortaapput Inuit Ataqatigiinniit Naaja Nathanielsen aamma Aqqaluaq B. Egede, Demokratiniit Niels Thomsen, taavalu Siumumiit Per Berthelsen aamma Finneeraq Karlsen.
