Aki-Matilda: Suli qineqqusaartoqannginnerani isumaqatigiinnialereerpugut
Folketingimut qinigaasoq Siumumeersoq Aki-Matilda Høegh-Dam Mette Frederiksenimik isumaqatigiinniarnerni angusaqarluarnissaminik periarfissaqarluarluni isumaqarpoq.
Siumut socialdemokratinik Mette Frederiksenimillu tapersersuiniarluni siumoortumik nalunaaruteqarami partiini kisimiilluni kina statministerissatut tapersersorniarnerlugu siumoortumik nalunaaruteqarpoq. Taamaalillutillu qineqqusaartoqannginneranili isumaqatigiinnialereertut Aki-Matilda Høegh-Dam oqarpoq.
- Aallartereertussaagamik aamma suli qineqqusaartoqannginneraniluunniit. Taamaammat isumaqatiginninniarnerit ingerlappagut. Tamanna pisuuvoq qulakkeerniaratsigu ilumuuittumik allannguisinnaanissarput. Taamaammat ippassaq aallartiinerugaluartoq taamaakkaluartoq qineqqusaarutigut aamma pingaartitavut naleqartitavullu nalunngereerpaat, Aki-Matilda Høegh-Dam KNR-imut oqarpoq.
AAMMA ATUARUK Aaja Chemnitz Larsenip Mette Frederiksen qanimut suleqatigisinnaassasorigaa
Aallartiinerusumik ataatsimiinnermik taasamini ilaatigut politiini assigiimmik akissarsiaqartitsinissamut, politiit umiatsiaataannut Sisammut arfanniarnerlu pillugu ataatsimiititaliarsuarmut IWC-mut tunngasunik oqallisigisaqarlutik Aki-Matilda Høegh-Dam paasissutissiivoq.
Isumaqatigiinniarnerilli suli naammassinngimmata qanoq ingerlanersut maanna oqaluttuarerusunngilaa.
- Ataatsimiissutigisat qulakkiissagaanni ilumut piviusunngussanersut taava isumaqatiginninniarnerit ingerlalluarnerata kingorna inuiaqatigiinnut saqqummiullugit, tassa aajuna periuserirusutaq imatoqqissaaq ingerlariaaseqarusuppugut. Taamannak qulakkeersinnaagatsigu inuiaqatigiit aamma avaqqutinnginnissaat, iluamik erseqqissumillu oqaatigisinnaagaanni qanoq periuseqassanersoq, Aki-Matilda Høegh-Dam oqarpoq.
Issittoq pillugu ministerimut suli isumaqatigiinngitsut
Aki-Matilda Høegh-Damip Inuit Ataqatiinneersullu Aaja Chemnitz Larsenip nunatsinnut iluaqutaasunik sapinngisamik angusaqarluarniarlutik Folketingimi suleqatigiinniarlutik oqaatigereerpaat. Inuit Ataqatigiilli Issittoq pillugu ministerimik pilersitsinissamut kissaataat pillugu suli isumaqatigiinngillat.
- Nunarput Issittumiippoq, kisianni Savalimmiut Danmarkiluunniit Issittumiinnatik. Taamaammat Issittumut tunngasoq sooq Danmarkimi inissisimassanersoq paasisinnaanngilarput. Issittumut tunngasumik ilumut inissitsissagutta Naalakkersuisut avaqqunneqannginnissaat pingaaruteqarsoraarput, oqartussaaqataanerput annikitsinneqassannginnami. Massakkut isigisakka malillugit taamaattumik Danmarkimi pilersitsitsigaanni oqartussaaqataanerput Naalakkersuisut aqqutigalugit kisianni aamma nunaqqatigut aqqutigalugit annikillisarneqassammat taanna akuerisinnaanngilarput, Aki-Matilda Høegh-Dam oqarpoq.
