Aaja Chemnitz Larsenip Mette Frederiksen qanimut suleqatigisinnaassasorigaa

Nunatsinnit Folketingimut qinigaasut marluk Aaja Chemnitz Larsen (IA) Aki-Matilda Høegh-Damilu (S) Danmarkip statsministerissaanik Mette Frederiksenimik ataatsimeeqateqareerput.

Aaja Chemnitz Larsenilu naapertorlugu pitsaasumik ukiunullu aggersunut isumalluarnartumik ataatsimiipput.

- Kingullermik isumaqatigiinniaqateqarama kingusinnerusukkut isumaqatigiinniaqateqarpunga. Taamaammat taama siusitsigisumi peqataatinneqarnera pitsaasuuvoq, Aaja Chemnitz Larsen oqarpoq.

Taanna nangillunilu oqarpoq, naalakkersuisunik socialdemokratiskiusunik tapersersueriaannaalluni, tamannalu ataatsimiinnermi oqaatigalugu.

- Pitsaasorujussuarmik ataatsimiittugut isumaqarpunga, neriulluartupilussuuvungalu, Aaja Chemnitz Larsen oqarpoq.

Taassuma Aki-Matilda Høegh-Damitut Mette Frederiksenimut kissaatigisai arlaqarput.

Inuit Ataqatigiit Siumumik suleqateqarluni politiit inissiisarfinnilu paarsisut kalaallit danskillu assigiimmik akissarsiaqartinnissaat ilaatigut kissaatigaat. Inuit Ataqatigiit aamma kissaatigaat Issittoq pillugu ministereqalernissaq.

- Tigussaasunik arlalinnik kissaateqarpugut. Ilaatigut nunatta Danmarkillu siunissami atassuteqarnissaat oqaluuseraarput. Aamma ministerimik Issittumik akisussaasussamik kissaateqarnerput oqaluuseraarput, ataatsimiititaliassanullu kissaatigut erseqqissaassutigalugit. Nunatta nunanut allanut tunngasunut politikkimi peqataatinneqarnerunissaanut kissaateqarnerput aamma erseqqissaatigaarput, Aaja Chemnitz Larsen oqarpoq.

Folketingimut ilaasortat marluk ataatsimiiqqinnissamut qaqugu aggersarneqarnissartik suli naluaat.