Aki-Matilda Høegh-Dam politikkeritut marloqiusamik akissarsisalertussanngortoq
Inatsisartuni ilaasortatut qinigaarlaaq, Naleqqameersoq Aki-Matilda Høegh-Dam qaammammut annertoorujussuarmik akissarsisalissaaq.
Tassami Inatsisartuni Folketingimilu ilaasortaaffini tamaasa immikkut akissarsiffigisalerpai.
Inatsisartunummi ullormi qinigaanerminit tassa marsip aqqarnganiit akissarsiaqalerpoq.
Inatsisartut allagaataat apriilip aallaqqaataat 2024-meersoq naapertorlugu inatsisartunut ilaasortat qaammammut 48.291 koruuninik akissarsiaqartarput.
Folketingimi ilaasortat qaammammut 70.906 koruuninik akissarsiaqartarput, soraarnerussutisiallu saniatigut ilanngunneqartarlutik. Akissarsiat taakku marluk katillugit qaammammut 119.197 koruuniupput.
Taakkunanilu marlunni ilaasortaanermini ukiumut 1.430.364 koruunit akissarsiarisussaassallugit.
Aki-Matilda Høegh-Damili folketingimut qinersinerup tullianut qinigassanngorteqqinniarnani ilisimatitsissutigereernikuuaa.
Inatsisartunut qinigaassaguni Folketingiminngaanniit tunuarniarluni inatsisartunut qinersisoqanngitsorli paasissutissiissutiginikuuaa.
Folketingimili qaqugu tungaanut ilaasortaanissaa nalunartoq
Aki-Matilda Høegh-Damip Inatsisartuni suliassani nutaat ukkatarinissai naatsorsuutigalugu, KNR-imit apersorneqallatsiarnermini eqqaavaa.
- Sulinngiffeqarallarnissara naatsorsuutigaara, sinniisussallu atuutilissapput.
Aki-Matilda Høegh-Dam Folketingimiit qaqugorpiaq sulinngiffeqarallarniarnersoq suli nalunarpoq.
Kingusinnerpaamilli folketingip ukiua nutaaq oktobarimi aallartitsinnagu pissasoq, taanna KNR-imut oqarpoq.
- Pissutsit naliliiffiginialeruttorpagut, sinniisussalli oqaloqatigileruttorpakka, piareersimalluartillugillu atuutsilersissinnaassallugit neriuutigaara.
Folketingimi sinniisussat siulleq-, aappaat pingajuallu Siumumi 2022-mi qinigaanikut maanna Naleqqami ilaasortaasut, Aki-Matilda Høegh-Dam DR-imut oqaatigaa.
KNR-imit apersorneqarnermini tamanna aamma ilannguppaa:
- Folketingi tulliani ammalerpat Naleqqameersumik ammaanersioqataasoqarnissaa naatsorsuutigaara. Uangaanavianngilaq, qanorlu pisoqassanersoq piffissap takutikkumaarpaa.
Folketingimi qinersisoqarnerani 2022-mi Siumumut sinniisussatut Markus E. Olsen siullertut, tulliattut Karina Zeeb pingajuattullu Elvira Kûitse inissisimalluni.
KNR-ip Markus E. Olsen aamma Karina Zeeb pissarsiariniarsarigaluarpai iluatsinngitsumilli.
Sinniisussat taakku pingasut partiimi ullumikkut ilaasortaanersut KNR-ip Naleqqap allaffeqarfianut apeqqutiginikuuaa, akissutissarsinissarlu utaqqillugu.
