Akerliussutsimik takutitsisut USA-mi kongressi saassukkaat
Akerliussutsiminnik takutitsisut USA-mi inatsisartut ataatsimiittarfiannut isaapput. Senatip innuttaasullu sinnerlugit sinniisoqarfiup, tassa Repræsentanternes Husip, matugallarneqarnissaat inassutigineqarpoq. Politiit taama ilisimatitsisut nutaarsiassaqartitsiviup Reutersip allaaseraa.
Politiit gassimik qulliliornartumik atuillutik akerliussutsimik takutitsisut avissaartinniarsarigaat, tv-qarfiup CNN-ip toqqaannartumik aallakaatitaani tamanna ilaatigut takuneqarsinnaavoq.
Joe Bidenip USA-mi præsidentimut qinersinermi ajugaanera kongressimi ilaasortanit pisortatigoortumik akuersissutigineqaleruttortoq eqqissiviilliortoqalerpoq.
CNN-imit assini aamma takuneqarsinnaavoq Trumpimut illersuisut kongressip illorsuanut isaasimasut.
Qanorpiaq susoqarnera erseqqarinngilaq. Trumpimulli illersuisut illorsuarmut isersimasut sulilu iserneruleriartortut erseqqarippoq.
Tusagassiortup sumiiffimmiittup akerliussutsimik takutitsisut senatit inersuanut isersimasut oqaatigaa. Assit aamma taama takutitsisut tusagassiortumit Twitterikkut ingerlaartinneqarput.
Gassimut illersuutit piareersigit
Repræsentanternes Husimi ilaasortat gassimut illersuutinik issiavimmi ataanit piareersisariaqartut politiinit ilisimatinneqarput. Politiit allaasitik tigusimavaat.
Politiit Repræsentanternes Husimi inini aallaasilisarlutik akerliussutsimik takutitsisunut umeqqasut assitigut takutinneqarput.
CNN aamma MSNBC naapertorlugit arnaq Kongressip eqqaani aallaaneqarsimavoq. Pisumut tunngatillugu paasissutissat erseqqinngillat. Taanna qanoq kimillu aallaaneqarsimanersoq ilisimaneqanngilaq. Inuunermininngooq navianartorsiorpoq.
AAMMA ATUARUK USA-p senatiani republikanerit amerlanerussuteqartut siuttuata Bidenip ajugaanera nalunaarutigigaa
Politiit aallaannissimanertik NBC Newsimut uppernarsartippaat. Inuk taanna pineqarnersoq ilisimaneqanngilaq.
CNN naapertorlugu politiit qassiiusut ikilerneqarsimapput politiinillu ikinnerpaamik ataaseq napparsimmaviliaanneqarluni.
Donald Trumpimik tapersersuisut tuusintilikkaat præsidentimut qinersinermi inernerit akerleralugit kongressip nalaani akerliussutsiminnik takutitsipput.
Præsidentip tullersortaa Mike Pence inatsisartut allattoqarfissuannit The Capitolimit qimagutitinneqarpoq. Tusagassiortut The Capitolip eqqaanit taama tusagassiisut nutaarsiassaqartitsiviup Reutersip allaaseraa.
