Akademikeritut ilinniarsimanngitsoq pisortanngortussanngorpoq
Namminersorlutik Oqartussat tusagassiutinut nalunaarutaanni allassimavoq, Kalaallit Nunaanni inunngorsimasoq alliartorlunilu, soorlu aamma atuarneqarsinnaasoq Greentop Greenlandimi pisortaareerluni atorfittaartoq.
Taamaakkaluartoq Carsten Frank Hansenip atorfinitsitaanera pisarnermiit allaanerusutut taaneqarsinnaavoq.
Pisortatut atorfimmi tassani pingaarutilimmi atorfinitsitaasartut qaffasissumik ilinniarsimasuunissaat siornatigut piumasaqaataasartoq, amerlasuutigut økonomitut, immikkoortortaqarfillu pillugu taassumunngalu assingusumik aqutsinermik misilittaqarnissaq piumasaqataasarluni.
Carsten Frank Hansenilli pisortassatut toqqarneqarneranut tunuliaqutaasut allaapput.
Namminersorlutik Oqartussani suliaqarnermut nutaajuvoq, soorlu aamma pisortani suliaqarnermik misilittagaqanngitsoq.
Aningaaserivinni ilinniarsimasuuvoq, taamaalillunilu akademikeritut ilinniarsimasuunani.
Naalakkersuisoqarfimmi pisortanngortussaq Greentop Greenlandimi pisortatut atorfimminngaanniit Namminersorlutik Oqartussanut nuuppoq. Greentop Greenlandimi kisiartaalluni sulisuuvoq.
Greentop Greenlandip siulersuisuisa siulittaasuat, Ole Rud, Radioaviisip oqaloqatigisimavaa, Carsten Frank Hansenimillu suleqateqarnertik pillugu aperalugu:
- Tassunga atatillugu oqaaseqarsinnaanngilanga, Ole Rud, ingerlaannaq akivoq. Taamatullu akissuteqarnini itisilerusunnagu.
Aningaasaqarnermut naalakkersuisoqarfimmi pisortanngortussaq Danske Andelskassers Bankip Odensemi immikkoortortaqarfiani pisortatut siornatigut atorfeqarsimavoq.
Immikkoortortap ingerlalluarnissaanik akisussaaffeqartoq, tuniniaanermillu aamma akisussaaffeqartoq, aningaaseriviup ilisimatitsissutigaa. Nunap immikkoortuani pisortaq Carsten Frank Hansenip taamanikkut qullersarivaa.
Aningaasaqarnermut naalakkersuisoqarfimmi pisortaasimasoq, soraarsitaasimasoq, millionilikkaanillu tunineqartoq, Jan H. Lynge Pedersen taamaasilluni Carsten Frank Hansenip kingoraassavaa.
Jan H. Lynge Pedersen cand.merc.-itut ilinniarsimasuuvoq, taassumallu siuliani pisortaq Peter Beck, aningaasarsiornermik immikkut ilinniagaqartuulluni.
