Pisuuteqattaassimasut: Aki-Matildap Aajallu oqaloqatigiinnissartik pisariaqartissimagaat
Ikinngutinnaariinngitsut nalunanngeqaaq.
Tassa Folketingimut qinigaaqqeqqammertortavut marluk, Siumumeersoq Aki-Matilda Høegh-Dam Inuit Ataqatigiinneersorlu Aaja Chemnitz, pisuuteqattaallutillu assortuuttut qineqqusaarnermi tusarsaavoq.
Maannali allattupajaaq tusarsaapput.
Taakkumi Folketingimut qinigaaqqereernerminni Christiansborgimi ataatsimiipput.
- Oqaloqatigiinnissarput pisariaqartissimavarput, Aaja Chemnitz KNR-imut oqarpoq.
Aaja Chemnitz ataatsimiinnerminni assilisaminik Facebookimut ima oqaasertalerlugu siammarterivoq:
"Nuan’ - suleqqilerluni nuanneqaaq. Siumut suleqatigaagut Folketinngimi nunatsinnut ukkatarinninneq annertusarniarlugu".
Siumup siulittaasuata Erik Jensenip IA-llu siulittaasuata Múte B. Egedep peqataaffigisaannik ullup tulliani ataatsimiissallutik, Folketingimut qinigaaqqeqqammertut qinersinerup unnukkuani isumaqatigiipput.
Taaguussinerit agguataarneri
Aki-Matilda Høegh-Dam marlunngormat 6.655-inik qinersiseqarluni taaguunneqarnerpaavoq.
Tassa qinersisut pingajorarterutaannik taaguunneqarpoq.
Taakkua 2019-imi qinersisaasa marloriaatingajaraa.
Aaja Chemnitz kinguariarpoq.
Taanna 2019-imi qinersinermi taaguunneqarnerpaavoq, ukioq mannali qinersinermi 21,7 prontentinik, tassa 4.289-inik, taaguunneqarluni. Qinersinerup siuliani 5.669-inik taaguunneqarpoq.
Partiit taakkua marluk paartiilersoratik ulluinnarni suleqatigiinnerunissaat qinersisartut partiinilu taakkunani ilaasortat piumasarereeraallu taamaaliorput.
Suleqatigiinnissaq partiillu taakkua politikkikkut anguniagaat pingasunngormat ataatsimiinnermi eqqartoraat, Siumut ilisimatitsivoq.
Politikkikkut anguniagaqaqatigiittut, immikkulli isumaqatigiinniartut
Folketingimi qinigaaqqammertut partiminni siuttutik ataatsimeeqatigereerlugit Christiansborgimi ataasinngormat ataatsimeeqqipput.
Kisianni Aki-Matilda Høegh-Damilu sorpiaat oqaloqatigiissutigisimaneritik, Aaja Chemnitzip annerusumik oqaatigiumanngilaa, oqaloqatigiissutigisatilli naalakkersuisunngortitsinissamik isumaqatigiinnialeruttornernut attuumassuteqartut oqaatigalugu.
- Folketingimi suliani nunatsinnut tunngasuni sapinngisamik qanoq sunniuteqarsinnaatiginerluta ilaatigut soorunami eqqartorparput. Marluullutami tamaaliorusuppugut. Suliniuteqaqatigiissutigerusutatsinnullu tunngasunik soorunami aamma eqqartuivugut, taanna oqarpoq.
Nuummi oqaluusereriikkatit uppernarsaqqissimallugit, Aki-Matilda Høegh-Dam KNR-imut oqarpoq.
AAMMA ATUARUK Folketingimi ilaasortat Nunatsinneersut attaveqatigiinnerat pitsaanngitsoq
Partiilli taakku marluk Mette Frederiksen immikkut isumaqatigiinniaqatigissavaat. Ataatsimut isumaqatigiinniarnissaq Siumup siunnersuutigisimagaluaraa, Aki-Matilda Høegh-Dam oqarpoq.
- Ataatsimeeqqaaratta siunnersuutigaarput erseqqissumik marluulluta ataatsimoorluta isumaqatigiinniarnernut isissasugut. Kisianni aamma allatuulli ataqqisariaqarparput, partiini nammineq aamma anguniakkani aallaavigalugit oqaaseqarusuppat.
Taamaakkaluartoq Siumut IA-lu arlalitsigut suleqatigiissinnaasut, taanna erseqqissaavoq.
Ilaatigummi nunatsinni Danmarkimilu politiit pineqaatissinneqarsimasunullu inissiisarfinni nakkutilliisut assigiimmik akissarsiaqarnissaat nunatsinnilu eqqartuussiveqarnermut aningaasaliisoqarnerunissaq, partiit taakku marluullutik kissaatigaat.
Tamatuma saniatigut Københavnimi ilinnialeqqammersortatta kollegiamik inissarsissunneqarnissaat aamma qularnaarusuppaat taavalu suliani sillimaniarnermut nunanullu allanut tunngasuni sunniuteqarnerorusupput.
Aaja Chemnitzip Aki-Matilda Høegh-Damillu kunngip naalakkersuisussarsioqqusaatut toqqagaq, tassa Mette Frederiksen (S) tallimanngormat immikkut ataatsimeeqatigaat. Ataatsimeeqatiserineqaqqingajalernissartillu marluullutik naatsorsuutigaat.
