Aka Hansen nersornaaserneqartoq

Kalaaleq filmiliortartuullunilu filmiliornermi ilitsersuisartuusoq, Aka Hansen, naligiissitaaneq anguniarlugu kalaallit kulturiannik oqaluttuarisaanerannillu siammarterinini pillugu PlanBørneFondens Pigepris 2023-mik nersornaaserneqarpoq.

PlanBørneFonden tusagassiorfinnut taama nalunaaruteqarpoq.

Pigeprisenimik nersornaasiinissamut innersuunneqartunit pingasunit Aká Hansen nersornaaserneqarpoq, innersuunneqartut sinneri tassaapput nakorsaaneq, Henriette Svarre Nielsen kiisalu nittartakkatigut attaveqaqatigiiffimmik pilersitsisut, Ida Lissner aamma Nicole Jonasson.

Innersuunneqartut pingasut aalajangiisartoqatigiinnit oqalliseqataasartunit, isummersuisartunit inuussutissarsiuteqartunillu peqataaffigineqartumit toqqarneqarput.

Innersuunneqartut PlanBørnefondenip nittartagaatigut tamanit toqqarneqarsinnaanikuupput, Aka Hansenilu toqqarneqarnerpaalluni.

Aka Hansen, filmiliornermini, piviusulersaarusiornerminilu Kalaallit Nunaat pillugu sapinngisamik assigiinngisitaartunik saqqummiiniartarpoq, arnallu ikinnerussuteqartullu sinnerlugit oqaaseqartartuulluni.

- Arnat inuiaqatigiinnilu ikinnerussuteqartut ilisimasaqarluartut siunissaq eqqarsaatigalugu peqataatinnerulertariaqarpavut, taamaaliunngikkuttami ajalusuussaagut, Aka Hansen, oqarpoq.

Aka Hansenip nersornaaserneqarnermi saniatigut Tuborgfondetiminngaanniit 20.000 koruuninik aamma tunineqarpoq.

PlanBørneFondens Pigepris ukiut arfinilissaat tunniunneqarpoq. Inummut suliniaqatigiiffimmulluunniit naligiissitaaneq pillugu immikkut ittumik suliniuteqartumut tunniunneqartarpoq.

KNR-ip Aka Hansen apersorniarsaraa.