Ajutoortoqartillugu misissuisartut misissuissapput

Nuummiit ippassarli aallartoqarsinnaananilu tikittoqarsinnaanngikkaluarpoq, islandimiulli timmisartuutaat mittarfimmiit peerneqareersoq Miittarfeqarfiit ilisimatitsissutigaat.

Nuummi Mittarfimmi ajornartorsiuteqarneq pissutigalugu, timmisartuussineq ullumikkut kinguaattoorfiullunilu ulapititseqaaq. Silalu pitsaavallaanngimmat kinguaattoornerit amerlinerupput.

Timmisartorsuup Airbusip "Norsaq"-p Kangerlussuarmiit Københavniliarnissaa kinguartinneqartariaqarsimavoq, annertunerusumilli unnugu paasissutiinissaq Air Greenlandip naatsorsuutigaa.

Nuummi ippassaq anorlingaatsiarnera timmisartup minnerliorneranut pissutaasoq ilimagineqarpoq, ajutoortoqartilluguli misissuisartut misissussavaat, timmisartoq innaarsukkut sooq nakkangajalluinnarsimanersoq. Issimasunik - ilaasunik inuttanilluunniit annertunerusumik ajoqusertoqanngilaq, issimasullu tarnip pissusaanit ilisimasalinnit ikiorserneqarnissaat Mittarfeqarfiit neqeroorutigaat.

- Upalungaarsimaneq pilersaarutit malillugit ingerlanneqarsimasoq paasitinneqarpunga, mittarfeqarfimmilu sulisut suliassatik suliarereerpaat. Taamali pisoqarsimagaangat ataavartumik nalilersuisarpugut, qujanartumilli akuttusuumik taama pisoqartarpoq. Qujanartumillu aamma issimasut sulisulluunniit arlaannaalluunniit timimikkut ajoqusinngillat, Mittarfeqarfinni pisortaq, Niels Kreutzmann, oqarpoq. Ajutoortoqarsimatillugu misissuisartut politiit suleqatigalugit misissuinerisa naammassinissaat Niels Kreutzmannip maanna utaqqiinnalerpaa.

Air Icelandip timmisartuutimik qanoq ajoqusersimatiginera aamma misissortussaavaa, taamaammat Air Icelandip pisortaa Nuummut maanna ingerlaarpoq.