Amerikami atuagassiami Rolling Stonemi allaatigisaq naapertorlugu USA-p naalakkersuisuisa imaani uuliasiornermut allaffeqarfitsik - Minerals Management Service - aqqutigalugu BP aamma Shell Chukchip imartaani Ruslandip qanittuaniittumi kiisalu Ualerngup Tarajuani (Beaufort Havimi) Alaskap eqqaaniittumi misiliillutik aqqanileriarlutik qillerinissaannut akueraat.
BP pilersaarutai tassaagunarput siullermik qeqertannguup Liberty-p eqqaani qillerinissaq tassanngaanniillu sanimut kilometerit arlallit qillerinissaq, uuliasiortitseqatigiiffimmit sumiiffik uuliamik nappartanik 105 millioninik imaqartussatut missiliuunneqartoq anguneqarserlugu.
Atuagassiap allaaserisaa naapertorlugu tamanna nunarsuarmi qillerinerit takinersarissavaat, BP-llu allatut ajornartumik teknologii atorlugu periarfissanik annerpaaffissaaniititsinissaanut pinngitsaalisariaqarluni, Rolling Stone-imilu allaaserineqarpoq, "unammilligassat aatsaat taama annertutigisut", tassami BP-p tamanna taammagu "nunarsuarmi silap pissusaa imaannannginnerpaaq".
Nunani issittuni misiliilluni qillerinissat pinngortitamik illersuiniaqatigiiffinnit kamaatigineqartorujussuupput. Immikkut paasisimasallit mianersoqqussutigaat nunani issittuni uuliamik maqisoorneq Mexicop kangerliumanersuani pisuminngarnit annertunerussasoq - ilaatigut siku umiarsuarnit sikusiutinit ingerlavigineqarsinnaanngitsoq pissutigalugu, ilaatigullu sinerissamik nakkutilliisut ikiuisussat qaninnerpaat kilometerinik tuusintilinnik ungasissuseqarnerat pissutigalugu.
- Mexicop kangerliumanersuani avatangiisuni naleqquttuni uuliamik maqisoorneq salissallugu taama ajornakusoortigippat, taava nunani issittuni saliinissami iluatsilluarniarisi, Rolling Stone-imi isornartorsiuisartut ilaat Sheldon Whitehouse allappoq.