Amerikamiu Canadamiit nunatsinnut nalunniartoq
Misigisaqarumatooq Justin Fornal sapaatiuppat aggustip arfineq-aappaanni Qaanaamut tikissaaq. Taannami imaani nilleqisumi Canadami Pim Islandimiit Kalaallit Nunaata tungaanut 40 kilometerit sinnerlugit isorartussuseqartumi nalunnialersaarpoq.
Siunertaraami silap allanngoriartornerata ukkatarineqarnerunissaa, naggueqatigiillu INUIT silap nillertikkiartorneranit qanoq sunnerneqarsimanerat, Justin Fornal KNR-mut taama oqaluttuarpoq:
- Kissaatigaara silap allanngoriartornera maluginiarneqartariaqartoq, Qaanaamilu najugalinnik inoqartoq kulturi pinngortitallu maanna allanngoraluttuartup ataqatigiittussaanerannik pingaartitsilluinnartunik. Imaatigut nalunnissara arlalinnut uisitsissasoraara.
Ilaat oqarusussapput taamaaliorneq allannguutaanavianngitsoq. Isornartorsiuinerit tamakku qanoq igaagit?
- Issiavimmut ingilluartitaaginnarluni iliuuseqannginneq ajornanngitsuararsuuvoq. Nalunnerli iliuusissatut annikikkaluarpoq, imaassinnaavorli inuit tamatuminnga tusartut aamma iliuuseqarusulersut, aap tamanna pillugu inuunera navianartorsiortikkaluarukkuluunniit iliuuseqarfigerusuppara, oqarpoq.
Uisitserusulluni nalunneq
Justin Fornal angutaavoq inuusuttoq naluttartutut unammisartuusoq, ukiualuinnaalli aatsaat qaangiupput pinngortitami isorartuumut naluttaleramili.
Taamaaliortarnini aallartippaa, illoqarfimmi najukkamini kuummi naloqqaarami, taassumami salinneqarsimanera malugeqqullugu taama iliorsimavoq. Tamatuma kingorna USA-mi Irlandimilu sumiiffinni arlalinni immikkut issuseqartunik naluttarsimavoq.
Ullut ilaanni nunap assinga isiginnaartillugu malugilersimavaa atlantikup avannarpasissuani Canadap Kalaallit Nunaatalu akunnerani imartami isorartugisassaanngitsunik aqqutissaqartoq. Isumataarporlu masassiutinik attallaaleriarluni naluutinillu isarusseriarluni ikaarlugu nalukkumallerumallugu:
- Eqqarsarpunga, isorartussuseq taanna nalussinnaavara, taavalu aamma isumataaqqippunga nuna issittoq taamaalillunga maluginiarneqalersissinnaallugu.
Issittumi silap allanngoriartornerata malugineqarnissaa pillugu Justin Formal sapiitsuliornialerpoq
Nilleq qunuginngilaa
Justin Fornal sungiusarluni Hudsonip kuuani najukkaminut ungasinngitsumi New Yorkip eqqaaniittumi naluttarpoq. Tassani imaq ukiuunerani qerinnarsinermut killittarpoq, angutillu taassuma Kalaallit Nunaata avannaani nilleqisumi nalunnissaanut tamanna sapiisernerulersitsivoq.
- Masassiutinik naluuteqassaanga, timera illersorniarlugu, aqqutaalu tamaat kissassimaartissavaannga. Ukiukkut naluttuaannartuuvunga, taamaammallu timima nilleq attassinnaavaa, oqarpoq.
Isumannaatsumik ingerlaarnissaa pillugu Justin Formal qaannamik ingiallorteqassaaq, taassumalu ingerlaarnerup piviusunngortinneqarnera alaatsinaajutigalugu akunnerit affakkaarlugit qasuersaartittassavaa, aqqutaata sinnera tamaat nukissaqarsinnaaqqullugu.
Nittartakkami Great Arctic Swim Justin Fornalip nalunnera malinnaaffigineqarsinnaavoq.