Ajunaartunut qimataasut akissutisinissamik utaqqikatapput

Umiarsuup Hans Hedtoftip 1959-imi ajunaarneranut atatillugu misissuinermi inerniliinerup eqqortuuneranik apeqquteqaatip, Inuinnaat akornanni saqitsaassutinut qullersaqarfimmit Civilstyrelsemit siorna februaarip qaammatanili suli akineqannginnera, qimataasunit qisuariarfigineqarpoq.
Allattoq Jaaku Lyberth
novembarip 06-at 2009 09:50

Qimataasut pasilliutigineqartoq pillugu Inuinnaat akornanni saqitsaassutinut qullersaqarfimmut Civilstyrelsemut siorna februaarip qaammatani attaveqarput suliaq sumut killinnersoq paasiniarlugu, Aviisi atugagdliutit taamatut allaaserisaqarpoq, mannali tikillugu suli akissutisinngillat.

Hans Hedtoftimi ajunaartut qimataasa gruppiani siulittaasup Anna Vindingip Civilstyrelsemit kalaallit nikanarnerusutut tunulliutitaasutullu pineqarsoralugit ernummatigaa.

Suliamik ingerlatsinerup kigaannerujussua kalaallit inuttut nalikinnerusutut Civilstyrelsemit isigineqarnerannik peqquteqarsinnaavoq. Tamanna uppernarsarsinnaanngilara. Taamaattorli allatut eqqarsarsinnaanngilanga. Taama sakkortutigisumik isornartorsiuivoq Sandra Vinding, ukiorpanni ajunaartut qimataasa gruppiani siulittaasuusoq. Naak ajunaarneq ukiut 50-it sinnerlugit matuma siornagut pigaluartoq umiiarneq puigorneqaqqajanngilaq.

Pilersuisumik peerunnerisigut aningaasatigut inissisimalernerup sunniutai annikillisarniarlugit nuna tamakkerlugu katersuiniartoqareerneratigut Grønlandsfonden pilersinneqarpoq. Taamaattorli aningaasaateqarfiup siunertaa qimataasut annertunerusumik iluaqutiginngilaat. Qimataasut katillugit 5,8 millionit koruuninik tunineqarput, 9,7 millionit koruunit allatigut ajunaarnerit kingunerisaanik tunineqarlutik allallu 4 millionit koruunit siunertanut allanut tunniunneqarput.