Ajunaalernermi kalerrisaarisoqartoortoq - Arktisk Kommandomeersut tallimangormat ulapittut
Issittumi Sakkutooqarfik tallimanngormat ulapipput.
Kalerrisaarisoqartoormat alapernaarsuuterpaaluit aallartinneqaraluarlutik unitsinneqarput.
Issittumi Sakkutooqarfiup nalunaarusiaani taama allaqqavoq.
Takornariartaat kalerrisaarisoq
Nuup kujataaniittumi Kangerluarsorusermiit takornariartaamiit kalerrisaarisoqarmat, umiarsuaq alapernaarsuut Ejnar Mikkelsen helikoptererlu Nuummiit aallartinneqarput.
Issittumi Sakkutooqarfiup angallat attaveqarfigaa, paasineqarporlu kalerrisaarisoqartoorsimasoq.
Ejnar Mikkelsen Nuummut uternermini allamit kalerrisaarteqqippoq. Oqartussaasut arlaqartut timmisartullu kalerrisaarisunik Sermitsiaminngaaneerpasittumik ujaarleriartorput.
Kalerrisaarisoq suminngaaneerneranik nassaartoqanngimmat aqaguani suliaq unitsinneqarpoq.
Qaarusummiit kalerrisaarisoqartoq
Ilulissat avannaata tungaaniit tallimanngormat kalerrisaarisoqarpoq. Ilulissat avannaata tungaani qaarusummiit kalerrisaarisoqarluni.
Umiarsuaq alapernaarsuut, Lauge Koch, helikoptererlu ujaasiartorput. Helikopterip ingerlaarnerani kalerrisaarisimasut inunnit allanit qanittumiittunit tikinneqarput.
Tassanili aamma paasineqarpoq kalerrisaarisoqartoorsimasoq, Issittumi Sakkutooqarfik allappoq.
Kalerrisaarineq kinguneqarluartoq
Angallat Nuummiit Qaqortuliartoq, tallimanngornerup ualiani nalunaaqqutaq marlup missaani, Aasiaat Radioanut kalerrisaarivoq.
Inuit arfineq pingasut meerartallit angallammiissimasut, Qaqortumi Politiini pisortaagallartup Kunuk Jakobsenip oqaatigaa.
Silarluup ataani inuit taakku angallammiit qimagussuuttariaqalerneranut aarlerinartorsiortoqarsimasoq, Issittumi Sakkutooqarfiup nalunaarutaani allaqqavoq.
Umiarsuaq alapernaarsuut, Thetis, ikiuiartorluni aallarmat, Air Greenlandimeersoq helikopteri annaasiartorluni aallartinneqarpoq. Angallammili ilaasut nalunaaqutaq 15.30 nammineerlutik ingerlaqqissinnaasimanertik nalunaarutigaat.
Issittumi Sakkutooqarfik Qaqortup eqqaaniit tallimanngornermi kalerrinneqarpoq. Tamaanni navianartorsiortoqarnersoq Air Greenlandimeersumik helikopterimik alakkarneqarpoq.
