Ajornartorsiut toqqorterniarneqarsimavoq
- Nalunaarusiaq pisortanut nalunaarutigineqarpoq. Aamma kommunalbestyrelsip isumaginninermut atatsimiititaliaani ilaasortat nalunaarfigineqarput oqaluttuunneqarlutillu qanoq pisoqarneranik qanorlu iliulikkersaarnersugut.
Namminersorlutik Oqartussaniit Kommuneqarfik Sermersuumiillu ulloq unnuarlu angerlarsimaffimmi Tûgdlimmut 2009-mi nakkutilliiartornermiit, Radioavisimi oqaluttuareriikkatsinnnit nalunaarusiaq pillugu, kommunimi sulisuusimasoq taama oqarpoq.
Tûgdlimmi pissutsit isorineqartut sulisuusimasup taassuma qanimut ilisimasaqarfigai. Suliaq mianernarmat sulisuusimasup kinaassusia saqqummiutinngilarput.
Sulisuusimasup meeqqanik angajoqqaanillu attaveqartarnermigut - aammalu Radioavisimiit uppernarsaatissaqartitatsinnik nakkutilliiartoreernermigut - meeqqat qanoq atugaqarnerannut isumakuluppoq:
- Isumakulunnartunik paasisaqaqattaarnikuugatta. Meeqqat sulisunit attortittarnerminnik ajortumillu pineqartarnerminnik naammagittaalliortarput, sulisuusimasoq oqarpoq.
Nassuiaavoq nakkutilliinermiit nalunaarutit, isumakulunnermik imaqartut, akisussaasunit nipangiunniarneqarsimasut.
- Nalunaarusiat saqqummiunneqartut - naak ernumanartorjusuugaluartut toqqissisimananngitsullu - nipangersarneqartutut ipput, susoqanngilaq.
Tassalu meeqqat amerlanersaat Tûgdlimmi, kommunimeersut nalunaarnerattut pitsaanngeruttorami meeqqanut inuusuttunullu misigissutsikkut sanngiitsunut inissiivigissallugu naleqqutinngitsumi, najugaqaannarput. Atukkat, sulisuusimasup oqarneratut Kommumeqarfik Sermersuumit ukiunit qulingajanni ilisimaneqarsimapput!
Radioavisimiiit ataasinngormat uppernarsarparput, meeqqat tassani najugaqartut toqqissisimannginnertik pillugu kommunimi sullissisuminnut 2001-mili allassimasut.
- Pissutsit ajunngitsussaapput! Meeqqat illersorneqareeramik aamma inissinneqarnerminni illersorneqaqqittussaapput. Ilanngui assorsuaq sumiginnagaapput, sequmeqqareeerlutik ineriartornermikkullu ikilerujussuarneqareerlutik. Qaavatigut taamannak misigitinneqarnerat eqqarsaatigalugu, soorunami tujorminaqaaq, sulisuusimasoq oqarpoq.
Aperigatsinni, paasissutissiiniarluni nammineq naammattumik iliuuseqarsimanersoq, nassuiaavoq, ajornartorsiutit nilliaatigisimallugit, pisortanilli naggaterpiaatigut akisussaasuusunit tusaajumaneqarsimanani.
Inissiiffiusinnaasunik amigaateqarnerujussuaq, Tûgdlimmik suleqateqaannarnermut nassuiaataasinnaasoq naliliivoq:
- Inissiiffissaaleqinerup kinguneranik meerartavut tamatut kingunilimmik misigitinneqarput. Ingerlatsinerat ilumut ajunnginnersoq isornartoqannginnersorlu qulaaniit nakkutigineqanngimmat, Kommuneqarfik Sermersuumi sulisuusimasoq oqarpoq.
Tûgdliup pisortaanni ullumi arlaleriarluta oqaaseqartitsiniaraluaratta iluatsinngilarput.
