Ajornartoornermi sianerniarneq pisariuallaarnerarpaat
Ajornartoornermi sianerfissap Danmarkimiittup Alarm 112-ip assinganik Nunatsinni sianerfissaqalernissaa taassuma ujartorpaa:
- Ikiorneqarnissaq pillugu pingasunik kisitsisitalimmik toqqaannartumik sianerfissaqartoqartariaqarpoq. Ilitsersuutit tusaaqqaarnagit ikiortissamik pissarsisoqarsinnaasoqartariaqaraluarpoq. Inuk kinaluunniit peruluttoq ikiortissamik pissarsisinnaasariaqarpoq. Ajornannginnerusumik kalerriisoqarsinnaanissaanut siunnersuut taammaattumik tapersersorpara, Napparsimasut Kattuffianni siulittaasoq Astrid Hansen Hard KNR-imut oqarpoq.
Ikuallattoqartillugu arlaatigulluunniit ajornartoortoqartillugu ajornannginnerusumik kalerriisoqarsinnaanissaa, ikiueqqaarnermik ilitsersuisup Otto Albrechtsenip, Kalaallit Røde Korsianneersup, tamanna aamma kissaatigaa:
- Kalerriiniarnermi aporfiit sivitsorsaavallaartarput. Ajornartoornermi maani Nunatsinni nalunaarfissamik ataatsimik saaffissaqanngilagut, tassa normumik ataatsimik saaffissaqanngilagut. Piffissarujussuaq atorlugu annaassiniartussanik kalerriiniartarneq, inuit toqunerannik kinguneqarsinnaavoq, Otto Albrechtsen KNR-imut ippassaq oqarpoq.
Nuup ilaani Blok 1-imi innaallagissamik sakkortusaavik ataasinngormat ikuallattoormat, qulinnguani najugallip qatserisartunik kalerriiniarnermini aporfeqarpoq:
- Nukkama qatserisartunut sianeqquaanga, uangalu qatserisartut normussaarukkakkit politeeqarfimmut sianerpunga. Politiilli normunik paasiniaavimmut sianeqquaannga, normuallu tassani paasivara. Taava 113-imut sianerpunga, nammineerlunili akisartukkut ilisimatinneqarpunga politiinut sianeqquneqarlunga. Qatserisartut kingorna takkupput, Kirstine Godtfredsen oqarpoq.
