Ajornannginnerusumik kalerriisoqarsinnaanissaa ujartorpaa
Nuummi Blok 1-imi ataasinngormat ikuallattoortoqarneranut atatillugu kalerriiniarnermut aporfiit tunuliaqutaralugit Otto Albrechtsen taama oqarpoq:
- Kalerriiniarnermi aporfiit sivitsorsaavallaartarput. Ajornartoornermi maani Nunatsinni nalunaarfissamik ataatsimik saaffissaqanngilagut, tassa normumik ataatsimik saaffissaqanngilagut, ikiueqqaarsinnaanermik sungiusaasoq, Kalaallit Røde Korsianneersoq, Otto Albrechtsen oqarpoq, ajornartoornermi normut saaffigineqartussat assigiinngippallaarnerat isornartorsiorlugu.
Innaallagissamut sakkortusaavik Nuummi Blok 1-ip naqqaniittoq ataasinngormat ikuallattoorfiuleraluarpoq.
Ilaqutariillu qulinnguani najugaqartut ikuallattoqarneranik kalerriiniarnerminni aporfeqarput. Anaanaasup Kirstine Godtfredsenip kalerriiniarnini ima oqaluttuaraa:
- Nukkama qatserisartunut sianeqquaanga, uangalu qatserisartut normussaarukkakkit politeeqarfimmut sianerpunga. Politiilli normunik paasiniaavimmut sianeqquaannga, normuallu tassani paasivara. Taava 113-imut sianerpunga, nammineerlunili akisartukkut ilisimatinneqarpunga politiinut sianeqquneqarlunga. Qatserisartut kingorna takkupput, Kirstine Godtfredsen oqarpoq.
Oqarasuaat angallattagaq atorlugu normu kalerriiffissaq tassaavoq normu 112, oqarasuaatit nalinginnaasut atorlugit sianerfigineqarsinnaanngitsoq. Normu taanna pillugu paasissutissiisoqartariaqartoq, Otto Albrechtsen oqarpoq:
- Normu 112 assersuutigisinnaavara. Oqarasuaatit angallattakkat atorlugit sianerfigineqarsinnaavoq. Normu taanna normut allattorsimaffianniinngilaq. Paasissutissiisoqartariaqarpoq. Normormi taanna oqarasuaatikkut angallattakkakkut periarfissaasoq inuit amerlasuut naluaat, Otto Albrechtsen oqarpoq.
Normut assigiinngitsorpassuit atoqqaarlugit ajornartuulernermi kalerriiniartarneq piffissaajarnartarpoq, inuillu toqunerannik kinguneqarsinnaalluni, Otto Albrechtsen oqarpoq:
- Piffissarujussuaq atorlugu annaassiniartussanik kalerriiniartarneq, inuit toqunerannik kinguneqarsinnaavoq, Otto Albrechtsen oqarpoq.
