Air Icelandimik isumaqatigiissut Kristian Jeremiassenip atorunnaarseqquaa
- Akissut tupinnarujussuarpoq, Kristian Jeremiassen oqarpoq.
Suulliuku Aningaasaqarnermut Naalakkersuisup Palle Christiansenip akissutaani tupigigai?
Akissummi ilaatigut atuarneqarsinnaavoq, angallanneq allanngunngippat Air Icelandimik isumaqatigiissut Nunatta Karsianut iluaqutaassasoq, Island aqqutigalugu angalasareernerit sipaarfiussammata.
Angallannerli allanngorpat, tamanna Nunatta Karsianut qanoq sunniuteqassanersoq nalunarpoq, pissutsit inuiaqatigiit aningaasaqarniarnerinut tunngasut arlalissuit attorneqassammata.
Kristian Jeremiassenillu tamanna apeqquserpaa:
- Air Icelandimik isumaqatigiissut Nunatta Karsianut iluaqutaaginnassasoq, Naalakkersuisut oqaatigaat, taamaattorli oqaatigineqarpoq Nunatta Karsianut sunniutissai siulittuutigineqarsinnaanngitsut. Tassa imatut paasissavarput: Naalakkersuisut Air Icelandimik isumaqatigiissuteqarsimapput Nunap aningaasaqarneranut kingunissaa qanoq isikkoqartoq ilisimanagu, Kristian Jeremiassen oqarpoq.
Tamatuma saniatigut Namminersorlutik Oqartussat Air Icelandimut isumaqatigiissuteqarneranut Air Greenland Mittarfeqarfiillu naleqqussarsinnaassusiat apeqqutaalluinnarpoq.
Aamma naalakkersuisut allapput, Air Greenland Mittarfeqarfiillu pissutsinut nutaanut naleqqussangippata, tamanna nunatta karsianut sunniuteqarnerlussinnaasoq.
Timmisartut akunnillutik mittarnerinit ilaasunut akitsuutinit isertitat ikilinissaat aamma naatsorsuutigineqarsinnaasoq, aningaasaqarnermut naalakkersuisup Palle Christiansenip oqaatigaa, soorlu aamma Air Greenlandip kaaviiaartitaasa ikilisinnaanissaat ilaatigut aamma taaneqartoq. Nunattalu aningaasatigut annaasaqarnissaa Kristian Jeremiassenip aarleqqutigaa:
- Ilaasut 1000-iuppata 1 millionit koruunit sinnerlugit Mittarfeqarfiit annaasaqarnissartik ilimagaat, Air Greenlandillu nalunaarutigaa ilaasut 1000-iuppata 8 millionit koruunit sinnerlugit annaasaqassallutik. Tassani takusinnaareerparput Nunatsinni aningaasaqarnikkut annaasaqareersugut taamatut isumaqatigiissuteqarnerup kingorna, Siumut sinnerlugu Inatsisartunut ilaasortaq Kristian Jeremiassen oqarpoq.
