Air Iceland nunatsinni suliaqarnerulerniarpoq

Air Icelandip Nuummut Nuummiillu ukioq naallugu timmisartuussisarnermisut,  Ilulissanut Ilulissaniillu apriilimi timmisartuussisalissaaq.

Air Icelandip kaaviaartitaasa 25-30 procentii nunatsinnut aamma nunatsinniit timmisartuussinerinit pisuupput.

- Islandimi ingerlatseqatigiiffiinnartut immitsinnut isigiunnaarpugut, Árni Gunnarsson StandBy-imut oqarpoq.

Islandimi aningaasarsiornikkut ajornartorsiornerup Islandimilu angallassinernik allanngortiterinerinerup ingerlatseqatigiiffik nunanut allanut saattariaqalersissimavaa. Kalaallit Nunaannuinnaanngitsoq aammali Savalimmiunut Norgemullu timmisartuussisalereerput. Tamannalu ingerlatseqatigiiffiup naatsorsuutaanut iluaqutaasimavoq. Amigartooruteqanngilarmi.

- Timmisartut Dash 8-t marluk Kalaallit Nunaaliartaatissatut 2007-imi pisiaraavut, iluatsippoq, ilimagisamit iluatsinneruvoq, Árni Gunnarsson oqarpoq.

Kalaallit Nunaannut timmisartuussisarnerminni ukiut marluk ingerlanerani ilaasorisartakkatik 19.000-iniit 25.000-inut amerlisimasut unnerpaat.

Air Icelandip anguniarpaa Island tassaalissasoq Kalaallit Nunaanniit angalasut nunarsuup sinneranut ingerlaqqiffiat pingaarneq.

Air Greenland suliaanik arsaarnianngilaat, amerlanerilli angalasarnissaannik periarfissiiniarput, pingaartumik Islandimiut Kalaallit Nunaannut aamma takornariartarnissaat eqqarsaatigalugu, Air Icelandimi pisortaq erseqqissaavoq.