Air Greenlandip piumasaqaatini attatiinnarniarpai

Air Greenlandip timmisartortartunut piumasaqaatai ilaatigut makkuupput:

- Akissarsiat immikkoortitaarnerini 31-usuni qullerpaat tallimat peerniarneqarput.

- Ukiumut pingaarnertut sulinngiffeqarfiusartoq qaammammik ataatsimik sivitsorniarpaat, taamaalilluni ikinnerusut aasakkut angallattoqaleruttornerani feeriarsinnaasunngorlugit.

- Ullumikkut ilinniaqqiffissatut taaneqartut ullut arfinillit atorunnaassapput.

Air Greenlandip neqeroorutini timmisartortartunut naammaginartutut isigisani attatiinnarusuppai:

- Timmisartortartut akissarsiamik qaffasereeqisut pigiinnarnissaata saniatigut, piumasaraarput ukiumut ullut suliffigisartagaat 192-iusut 198-inut amerlineqassasut. Nunatsinni sulisartoq nalinginnaasoq ukiumut ullunik 28-nik amerlanerusuni ukiumut sulisarpoq, Mads B. Christensen oqarpoq.

Mads B. Christensenip "akissarsianik pitsaasutut" taasai, aquttumut ilinniakkaminik naammassinnerlaamut ukiumut 500.000 koruuniupput, timmisartullu naalagaa sivisuumik atorfeqarsimasoq ukiumut 1,5 millionit koruuninik akissarsiaqarluni.

Illuatungeriit isumaqatigiinniarlutik qaqugu naapeqqinnissaminnik isumaqatigiissuteqanngillat.

Aaqqiagiinnginneq unitsinniarlugu Naalakkersuisut immikkut ittumik inatsisiliornissaminnut periarfissaqarput, taamaattorli akuliunnissaq maannamut eqqarsaatigineqanngilaq.

- Utaqqimaarpugut, soorunamili neriuutigaarput qanittukkut aaqqiisoqassasoq, neriuutigaarpullu illua'tungeriit inuiaqatigiinnut akisussaassuseqarnertik aamma paasigaat, minnerunngitsumik pissutigalugu Air Greenland assartuinermi aalajangiisuulluinnartumik inissisimammnat, Jens B. Frederiksen Sermitsiamut oqarpoq.