Air Greenlandip ilaasartuni angalanissamik allannguisinnaatikkai
Killilersuinerit nutaat Naalakkersuisut pingasunngornermi atuutilersitaat pissutigalugu Air Greenland qisuariaateqarpoq.
Danmarkip suaniluunniit angalasimaguit nunatsinnut tikikkuit ulluni tallimani angerlarsimaannassasutit tikinninniillu ullut tallimat qaangiunneranni misissorteqqissasutit killilersuinerni piumasaqaataavoq.
Tamatuma saniatigut Namminersorlutik Oqartussat nunatsinnit nunatsinnullu pisariaqanngitsumik angalanissat tamarmik innersuussutiginngilaat. Tamanna Danmarkimi COVID-19-imik tunillatsittut amerliartuinnarnerannik pissuteqarpoq.
Air Greenlandip ilaasartuni Namminersorlutik Oqartussanit killilersuinerit nutaat innersuussutillu pissutigalugu angalanissamik allannguisinnaatippai.
Angalanissamut billetti suugaluarpalluunniit nunatta Danmarkillu akornanni angalanissap ullua uterfissarlu allanngortinneqarsinnaavoq. Tamanna oktobarip ulluisa 18-iata tungaanut billetteqartunut atuuppoq.
Atlantikoq qulaallu angalanissanut tamanut, ulloq aallarfissaq uterfissarlu apeqqutaatinnagu allanngortinneqarsinnaapput. Angalanissaq saniatigut aningaasartuutitaqanngitsumik oktobarip ulluisa 18-iat ilanngullugu allanngortinneqarsinnaapput - tamatuma kingorna billetsinut malittarisassat nalinginnaasut atuutileqqissapput, Air Greenland oqarpoq.
Billetsilli allanngortinnissaanut periarfissat assigiinngillat. Billetsip suunera qangalu pisiarineqarsimanera apeqqutaavoq.
Billetsit septembarip arfernani siornatigulluunniit pisiat
Premiumimimik Standardimilluunniit septembarip arfernani siusinnerusukkulluunniit pisiamik billetseqaraanni Air Greenlandip nittartagaatigut nammineerluni allanngortitsisoqarsinnaavoq. Nittartakkap saqqaani "bilitsera" toorlugu allanngortitsisoqarsinnaavoq.
Billetsit septembarip arfineq-aappaani kingusinnerusukkulluunniit pisiat
Premiumimik, Standardimik Takussimilluunniit septembarip arfineq-aappaani kingusinnerusukkulluunniit pisiamik billetseqaraanni Air Greenlandip nittartagaatigut immersugassaq aaneqassaaq.
Takuss-imik billetseqartut tamarmik anglanissaminnik allanngortitsissagunik nittartakkamit immersugassaq atussavaat (septembarip ulluisa arfineq-aappaanni pisiarineqartut kisimik pineqanngillat). Immersugassaq nittartakkamit toqqaannartumik nassiunneqartarpoq.
Immersugassaq Air Greenlandip nittartagaata saqqaani Covid-19-imut quppernermi nassaarineqarsinnaavoq. Immersugassaq immersoriarlugu Air Greenlandimut nassiunneqassaaq.
Angalanissaq 2021-mi marsip ulluisa 31-at ilanngullugu tungaanut allanngortinneqarsinnaasoq, Air Greenlandip ullumi oqaatigaa.
Uani annerusumik atuaqarit.
