Air Greenlandip akigititai qaffaseqisut qatsuppaat
Taakkua Nunatta inuisa 7 procenteraat - taamalu amerlatigimmata tamanna Air Greenlandimit isiginngitsuusaarneqarusunngilaq. Taamaattumik qupperniliortut Air Greenlandimilu pisortat pingasunngorpat naapissapput.
- Inuppassuit Facebookimi qupperniliorlutik Air Greenlandip akigititaannut naammagittaalliorpata, akinut tunngatillugu isummersuutaat tusassallugit soorunami soqutigissavarput. Tamatumunngami peqatigitillugu Kalaallit Nunaanni akit sooq taama qaffasitsiginerat pillugu oqaloqatigiissinnaassagatta.
Air Greenlandip pisortaanera Michael Binzer taama oqarpoq. Taassumalu naapeqatigiinnissaq kinguneqarluassasoq neriuutigaa.
- Qanoq allatut iliorsinnaanitsinnik sullitatta siunnersuutiginiagaat tusassallugit neriuutigaara. Arlariinnimmi siunnersuutissaqartut tusareerpara, soorlu unnuinermut nerisaqarnermullu sillimmasiinissap toqqarneqarsinnaasunngornissaa eqqarsaatigaat tamakkununngalu tunngasunik tusarnaarusuppunga, Michael Binzer oqarpoq.
Taamaattorli oqallittoqarluarnissaa ilimagineqarluarsinnaavoq, tassami Facebookimi qupperniliortut Air Greenland qaffasippallaanik akeqartitsinermigut inuiaqatigiit kalaallit ineriartornissaraluinik kigaallassimaartitsisutut pisuutippaat. Tamannali Michael Binzerip akuerisinnaanngilaa:
- Pingaarnerpaatillugu oqaatigisariaqarpoq, Air Greenland mittarfiit sumiinnissaannik aalajangersaasuunngimmat imaluunniit akileraarutinik akitsuutinillu aalangersaaneq ajormat. Pissutsit arlalissuit pissutigalugit Kalaallit Nunaanni timmisartorneq akisuvoq. Maani innuttaasut amerlanngilagut taamaattumillu isumaqarpunga akit qaffasinnerinut Air Greenland kisimi pisuunngitsoq, Michael Binzer oqarpoq.
Air Greenlandip sullitaasa amerlasuut takkunnissaat Michael Binzerip kajumissaarutigaa. Taamaattorli akit apparnissaat neriorsuutigisinnaanagu:
- Neriorsuuteqarsinnaanngilanga, akilli appasinnerulernissaat anguniagaraarput. Assersuutigalugu bilitsit aappaluttut 2001-imit 30 procentimik appariartippavut, naak inuiaqatigiinni akigitinneqartut allat qaffariaraluartut. Tamanna angusatut pitsaalluinnartutut isigaara, Air Greenlandip pisortaanera Michael Binzer oqarpoq.
Ataatsimeeqatigiinneq pissaaq Air Greenlandip qullersaqarfiani pingasunngorpat unnukkut arfineq-pingasut qeqqaniit qulingiluat tungaanut.
